Shillong, Jymmang 07:
Ki la don haduh 217 ngut ki kyrtong kiba la ïakhun ïa ka ilekshon MLA mynta u snem kiba la duh ei noh ïa ka ‘Security Deposit’ lane ka pisa kaba ki la hap ban ai sha ka Election Commission of India (ECI) ha ka por ba ki thep kyrteng.
Ha kane ka ilekshon ba la dep, ki la don haduh 369 ngut ki kyrtong kiba la ïakhun bad kine ki kynthup ïa 333 ngut ki shynrang bad 36 ngut ki kynthei.
Hadien ba la dep ban kheiñ jingkheiñ da ka ECI, la shem ba haduh 217 ngut ki kyrtong ki la duh ei noh ïa ka ‘Security Deposit’ kaba dei ka pisa kaba ki hap ban ai ha ka por ba ki leit ban thep kyrteng kum ki kyrtong. Kane ka mut ba tang 152 ngut ki kyrtong ki la lait na ka jingduh ei ïa kata ka pisa.
Ha ka ilekshon sha ka Ïingdorbar Thawaiñ ha Meghalaya, na ka bynta ki kyrtong kiba dei ki Scheduled Tribe (ST), ka pisa (Security Deposit) kaba hap ban siew ka long T. 5,000 katba na ka bynta kiwei pat (General) ka pisa ka long T. 10,000 marwei.
Katkum ka Section 158 jong ka Representation of the People Act, 1951, la batai ha kano ka rukom ki kyrtong ki dei ban ïoh biang ïa ka pisa, la ka long T. 5,000 ne T. 10,000, hadien ba la dep ka ilekshon. Katkum ki kyndon, lada uno-uno u kyrtong u ïoh duna na ka 1/6 jong baroh ki ‘vote’ ba la thep ha ka konstitwensi, un ym lah ban ïoh shuh ïa katei ka pisa kaba u la ai ha ka por ba u la thep kyrteng.
Kum ka nuksa, lada ha kawei ka konstitwensi ka don 20,000 ka ‘vote’ ba la wan thep, uwei-pa-uwei u kyrtong uba ïakhun um dei ban ïoh duna ïa ka 3,333 ‘vote’ khnang ban lait duh ei kata ka T. 5,000 lane T. 10,000 kaba la ai ha ka por thep kyrteng. Na ka bynta kiba ïoh duna na kane ka 1/6 ki ‘vote’, ïa ka ‘Security Deposit’ yn ym lah shuh ban pynphai bad ka ïai sah beit bad ka Election Commission.
Na ki 217 ngut ki kyrtong kiba la duh noh ïa katei ka pisa ha kane ka ilekshon, 19 ngut ki dei ki General bad 198 ngut ki dei ki Scheduled Tribe. Kine ki 217 ngut, ki kynthup ïa ki 193 ngut ki shynrang bad 24 ngut ki kynthei.
Lada kheiñ kyllum lang, ki 19 ngut ki kyrtong kiba dei ki General ki la duh T. 1,90,000 katba ki kyrtong kiba dei ki Scheduled Tribe ki la duh T. 9,90,000 bad baroh lang ka poi T. 11,80,000.
