Kochi:
Ka iingbishar jong ka Kerala ka la kyntait ia ka jingdawa jong kiba bun ba dei ban khang ia kane ka phlim ban ym pyllait paidbah ha kaba bun ki sngew ba kane ka phlim ka ktah bha ia ki.
Naduh ba la pyllait paidbah ia ka trailer jong katei ka phlim bun ki la pyrshah jur halor kane bad dawa ba ym dei ban ailad ban pynmih ia ka.
Katkum ka khana jong kane ka phlim la iathuh halor ka jingjah rngai jong ki katto katne ki kynthei kiba ym shim dei satia ki muslim bad kiba la leit ban pyniasoh bad ka Islamic State.
Ha ka sngi thohdieng ka Kerala High Court ka la kyntait ia ka jingujor jong ki katto katne ba dei ban khang ia kane ka phlim ha kaba u Justices N Nagaresh bad Sophy Thomas kiba la shim khia ban peit bad bishar ia katei ka phlim bad shem ba kam don kano kano kaba sniew ha kaba iadei bad kane ka phlim bad dei ruh na kane ka daw ba ki la rai ba ailad ban pynmih beit ia ka.
Shuh shuh ha ka jing iakren jong kine arngut ki nongbishar bad ki lad pathai khubor ki shem ruh ba kane ka phlim kam da kaba thew ia ka niam Islam lane ia ki Muslim hynrei ka pyni ia ka jingleit pyniasoh jong ki riewkynthei na kiwei kiwei ki kynhun niam ban long ki dkhot ka Islamic State.
Kine ki nongbishar kila pynpaw ruh ba kito kiba pyrshah ia kane ka phlim ki dei kiba ym pat shim la iohi ia ka bad lehse ynda haba ki la ioh lad ban peit kin sa sngew lehraiñ pynban.
Ka iingbishar ka la ai jingbit ia ka CBFC ban pynmih ia kane ka phlim ha kaba kam shim don kano kano kaba sniew halor jong ka bad kaba ym don jingktah satia ia ki nongpeitkai.
