Shillong, Jymmang 07:
Hadien ka jingïoh jingtip kaba biang, ki shipai ka 193 Bn BSF ha ka Sngi Saitjaiñ ki la ïoh bat ïa 13 ngut ki nong Bangladesh kiba la rung tuh sha India lyngba ki jaka khappud ka East Khasi Hills.
Ha kajuh ka por, ka BSF ka la bat ruh ïa 3 ngut ki nong India (nongshong shnong ka West Garo Hills) na katei ka jaka kiba don bynta ban ïarap ïa ki nong Bangladesh ban jam tuh na shiliang sha shiliang khappud.
Ka BSF ka la ïoh bat ïa ki ha ka por ba ki nong Bangladesh ki la wan mih na ka jaka khlaw kaba hajan IB bad kiba la shong ha ka kali Tata Sumo kaba la pynïeng lypa ha katei ka jaka.
Kitei ki nong Bangladesh kiba la shah bat ki la phla ba ki la rung sha India da ka jingthmu ban leit sha Kashmir ban wad ki lad kamai lyngba ki kam bylla ne kiwei-kiwei ki kam ba rit ba ria. Ïa kitei ki briew la aiti noh sha thanat Dangar, East Khasi Hills ban leh ïa kaba donkam.
