Dawa ka VPP ban tohkit da ka NHRC/MHRC halor ka jingsiat ïap ki BSF ïa u Bah Roning

Shillong, Jymmang 07:

Ka Voice of the People Party (VPP) ka la pynrem ruh ïa ka jingsiat ïap ki briew jong ka Border Security Force (BSF) ïa u Bah Roning Nongkynrih kaba la jia ha ka Sngi Thohdieng hajan ka shnong Mawshun, East Khasi Hills.

Ha u kyrwoh khubor, u nongaiktien ka seng u la ong ba ka VPP ka dawa ba ki bor sorkar kim dei ban shim ïa ka jingim briew pyrshah ïa ka aiñ longbriew khlem da ïaid katkum ka lynti jong ka aiñ.

Ka VPP ka la dawa na ka sorkar ne ki BSF ba ki dei ban siew bai lutksan sha ki bahaïing jong u Bah Roning.

Shuh shuh, ka VPP ka la dawa ba dei ban pynlong da ka jingtohkit ïa katei ka jingjia da ka National Human Rights Commission/Meghalaya State Human Rights Commission bad ban pynshitom ïa ki briew kiba leh donbor lada lap.

Ha kawei pat ka liang, ka UDP Pynursla Circle ha ka Sngi U Blei ka la pynrem jur halor ka jingpynïap beiñ jong ki BSF ïa uwei u rangbah ha ka miet Sngi Thohdieng harum Mawshun.

Ha u kyrwoh khubor, u Bah Aihok Khongmalai, President ka UDP Pynursla Circle, u la ong ba ka Circle ka dawa ban kem mardor ïa ki ’riew thrang snam kiba siat im-im peit-peit ïa u briew u bym shym la don tiar jingïada eiei ruh em ïalade.

Ka Circle ka pynkynmaw ruh ïa u Symbud Myntri Rangbah uba dei u MLA jong ka thaiñ halor ka jingpynbna jong u ban ai ejahar halor ka jinghap maw ha Riat Rngaiñ kaba la bam ïa arngut ki mynsiem briew.

Katei ka jingjia, u Bah Aihok, u la ong ka la jan dap artad shi bnai bad ki pulit ki la dei ban kem ïa kiba trei torti ïa ka surok kiba dei ka daw jong ka jingïap jong arngut ki rangbah.

Ka UDP ka la phah ruh ïa ka jingsngewlem sha ki longïing kiba mad ïa katei ka jingjia ba sngewsih.