Shillong, Jymmang 07:
U MLA ka Sohra, u Bah Gavin M Mylliem u la ong ba ki shipai BSF kiba la siat ïap ïa u Bah Roning Nongkynrih na Jalynteng, Raid Nongkynrih, uba dei u nongñiah trok kit masi ki dei ban ngat ha ki kyndon kiba tyngeh.
U Bah Roning u la khlad ha ka miet 5 tarik hadien ba ki shipai Border Security Force (BSF) ki la siat ïa u katba ka trok kit masi ka dang ïaid ha surok ha kawei ka jaka hapdeng ka shnong Pomshutia bad Mawshun.
U Bah Gavin, hadien ka jingwan sngewlem sha ka longïing u Bah Roning ha ka step Sngi U Blei, u la ong ba lada ka long kumno kumno ruh, kat ban shim ïa ka jingim briew kam dei satia ka lynti kaba dei.
Da kaba pynrem jur ïa ki bor shipai BSF, u la ong ba ki bahaïing ki la dep buh da ka ejahar ha Thanat Pynursla ha ka sngi Saitjaiñ bad ma u ryngkat ki bahaīing un buddien ïa kane khnang bad un ïakren ba ka aiñ kan pynsted ban pynngat kyndon kiba tyngeh ïa ki shipai BSF kiba donkti.
Kum ban shu kdew ba u Bah Roning Nongkynrih u la ieh shadien ïa ar ngut ki khun ba dang rit bad ïa la ka kurim. Na ka liang ki bahaïing ki la dawa ba ka dei ban don ka jingbishar kaba hok bad ka Sorkar ka dei ban leh eiei na ka bynta ka longïing jong u.
