Shillong, Jymmang 07:
U Myntri Rangbah ka Jylla, u Conrad K. Sangma ha ka Sngi U Blei u la pynbna ba ki samla pule (ka Jylla) kiba pule ha Manipur ki la nang wanphai shuh sha ka Jylla bad kin don sa kumba 70 ngut eiei ki ban wanphai ïing mynta ka miet.
“Ki samla pule na Tura, Shillong bad kiwei-kiwei ki jaka jong ka Jylla kiba pule ha Manipur ki la wan poi suk poi saiñ sha ka Jylla bad la phah noh ïa ki sha la ki ïing ki sem,” la ong u Sangma ha ka rynsan lad pathai.
U la ong ruh ba u sngewkmen ban ïohi ïa ka durkhmat ba phuh samrkhie bad ka jingsuk mynsiem ha ki.
“Sa 70 ngut ki samla pule yn sa wanlam noh sha la ïing mynta ka miet. Nga ai khublei ïa ka kynhun kaba la trei bha ïa ka kam,” u la ong.
Ka Sorkar Jylla hapoh ka jinglamkhmat u Myntri Rangbah, u Conrad K. Sangma ka la shim ïa ki sienjam haba ïadei bad ka jinglong-jingman ha ka liang ka shong suk shong shngaiñ ha ka Jylla Manipur.
Ha ka 4 tarik mynta u bnai, ka la don ka jingïalang ban khmih bniah ïa ka jinglong-jingman ha kajuh ka por ban pyntikna ba ki samla kiba pule ha Manipur ki poi suk poi saiñ sha la ka Jylla.
Ha kajuh ka por, u Myntri Rangbah u la bthah ïa ki ophisar ban ym ïapeiñ halor ka jingshngaiñ jong ki samla pule bad ong ruh ba kin sdang ïa ka kam ha ka ban wanlam noh ïa ki sha la ïing da kaba pynbiang ïa ki liengsuiñ.
Na ka liang ka ophis u Myntri Rangbah ka la khmih ïa ka jingpynbiang liengsuiñ na bynta ki samla pule bad ha ka jingïatreilang hapdeng ki ophisar ka Sorkar Jylla bad ka tnad shipai ka ri, yn sa synran ïa ki samla pule na ki jaka sah jong ki sha ka kad liengsuiñ kaba ha Imphal.
Ha ka 5 tarik u Jymmang, 66 ngut ki samla pule ki la poi suk poi saiñ ha kad liengsuiñ Guwahati da ka Alliance Air kaba la pynbeit da ka Sorkar Jylla lyngba ka jingbthah u Myntri Rangbah.
Haba poi ha kad liengsuiñ Guwahati, ki samla pule ki la ïoh pdiang ïa ka bam ka dih bad la pynbiang ruh ïa ka leit ka wan jong ki ban wanphai sha ïing.
Haba phai pat sha ka 6 tarik mynta u bnai, 17 ngut ki samla pule ki la poi suk poi saiñ ha kad liengsuiñ Guwahati.
Ka Sorkar Jylla ka la pynbiang ruh ïa ki liengsuiñ ba kyrpang na Imphal sha Shillong ban ïaleh katba lah ban pynpoi kloi ïa ki samla pule sha la ka jong ka Jylla.
Lah ban kdew ruh hangne ba ka Sorkar Jylla ka la phah ïa 2 ngut ki ophisar ban leit bad sah ha Imphal ban khmih ïa ka jingpynkynriah ïa ki samla pule bad ki ’riew paidbah na katei ka Jylla kumjuh ban pynbiang ïa ki lad jingkyrshan na bynta ka leit ka wan jong ki samla pule.
Shuh shuh ka tnad Transport ka la pynbiang ïa ki kali lem bad ka bam ka dih na bynta ki samla pule bad ki ’riew paidbah kiba wan poi ha kad liengsuiñ, Guwahati man ka sngi.
Nalor kane, ka Sorkar ka ïakren ruh bad ki samla pule ha Manipur ban khmih bniah ïa ka jinglong-jingman bad pynbiang ïa ki lad jingkyrshan haba ïadei bad ka jingwan phai jong ki.
U Myntri Rangbah u la lum biang sa kawei ka jingïalang khmih bniah ha ka Sngi Saitjaiñ ban ïoh jingtip halor ka jingwan phai jong ki samla pule.
