Shillong, Jymmang 07:
Ka jingïalap ilekshon ha Sohïong konstitwensi ka la poi artad sha kaba kut ha kaba ki kyrtong bad ki seng saiñ pyrthei ki hap ban pynkut ïa ka jingïalap ilekshon ha ka Lah Sngi U Blei ha ka por 4 baje janmiet.
Ha kane ka sngi kut, u kyrtong ka NPP Bah Samlin Malngiang bad u kyrtong ka UDP Bah Synshar Lyngdoh kin pynlong jingïalang paidbah mar shiliang surok ha ka shnong Mawtap, Sohïong.
Ka jingïalap ilekshon ha kane ka konstitwensi kumba la ïohi ha kine ki khyndiat sngi ka long kaba khluit bha khamtam hadien ba la dep thep kyrteng u kyrtong ka UDP u Bah Synshar Lyngdoh ha ka 18 tarik u Ïaïong.
Ka jingïalap ilekshon ha Sohïong ka dei kaba ïa kynthoh bha hapdeng ka UDP bad ka NPP kiba donlang ha ka Sorkar MDA-II, katba kiwei pat ki seng ki kham kynjah ka rukom ïalap ilekshon.
Ha kane ka sngi ban pynkut ïa ka jingïalap ilekshon u Bah Samlin un pynlong jingïalang ha madan phutbol ba dang shu plie ha Mawtap ha ka jingïadonlang u Myntri Rangbah ka jylla u Conrad K Sangma, u Symbud Myntri Rangbah ka jylla, Bah Prestone Tynsong, ki MLA ka NPP kynthup ïa ki MLA ka PDF kiba dang shu wan pynïasoh shen sha ka NPP.
Katba u kyrtong ka UDP, Bah Synshar Lyngdoh un pynlong ïa ka jingïalang paidbah ha phyllaw ïing u Bah HDR Lyngdoh ha Mawtap ha ka jingïadonlang ki MLA ka UDP bad ki nongkyrshan.
Ha kane ka kajuh ka sngi, kata ha ka por 4:00 janmiet ka la dei sa ka pali jong ki ophisar ban leit sha man la ki Polling Station ban pynbit pynbiang ïa baroh ki jingdonkam namar ka jingthep vote ka ban long ha ka 10 tarik mynta u bnai ban jied ïa u nongmihkhmat sha ka ïingdorbar thawaiñ ka jylla bad ka jingñiew ïa ka vote kan long ha ka 13 tarik Jymmang, 2023.
Wat la ki kyrtong ki don hynriew ngut kiba la dep thep kyrteng, hynrei ka jingïakhun katkum ka jingpynpaw ki paidbah ka dei beit hapdeng ki ar ngut ki kyrtong, kita u Bah Samlin Malngiang na ka NPP bad u Bah Synshar Lyngdoh na ka UDP bud sa u kyrtong ka Congress Bah S. Osborne Kharjana bad kiwei kiwei kum u Bah Sandondor Ryntathiang na ka HSPDP, Bah Stodingstar Thabah na ka TMC bad Bah Serap Eric Khubuki na ka BJP.
Ka jingpynpaw ki paidbah ïa ka jingkhlaiñ kine ar ngut ki kyrtong, kita ka NPP bad UDP ka dei namar ki lah shisha ban khring briew ha man ki jingïalang paidbah da kaba kit briew man ki shnong khnang ban pyni ïa ka jingkhlaiñ.
Kum ban shu pynkynmaw, ka jingpynsangeh ïa ka ilekshon MLA ha Sohïong ka dei namar ka jingkhlad ba kyndit jong u Bah HDR Lyngdoh kum u kyrtong ka UDP ha ka 20 tarik Rymphang, 2023. Kane ka wan jia shi taïew shwa ban thep vote ha ka ilekshon ka ban long ha ka 27 tarik Rymphang, 2023 bad ka Election Commission ka ri India ka la rai ban pynsahteng shwa ïa ka jingjied nongmihkhmat ha katei ka konstitwensi.
