Jowai, Jymmang 07:
Kawei ka longkmie ka bym lah ban ïohi ki khmat, ka la jaw ummat brup mar ïa aiti ka Blind Lead Trust Organization ha ki kti jong ka, ïa u shabi jong ka ïing ba ka shna thymmai ïa ka.
Kane ka longkmie ka dei ka Kong Mary Kyndait na ka shnong Krem Myrsiang kaba hap ha Namdong C&RD Block, West Jaiñtia Hills District.
Shwa ban ïoh ïa ka ïing thymmai, ka Kong Mary bad la u lok ki sah ha ka ïing trep ba la sop da u phlang kaba la jot rathai bad bym shngaiñ ïa ka ban shong ban sah ban thiah ban dem artad ba ka dei kaba duna ki khmat.
Ki dkhot bad nongïalam ka Blind Lead Trust Organization kiba la ïohi ïa kane jingeh jingjynjar jong ka Kong Mary, ki la ïarap pynshna ïa ka da ka ïing ba kan ïoh rieh tngen kaba lait na u slap ka lyer bad kiwei ki jingma ba ap ïa ka.
Ïa kane ka ïing thymmai jong ka Kong Mary la ot ribon da u MDC ka thaiñ u Bah Dawan Lyngdoh bad ïa u shabi ïing la aiti ha ki kti jong ka Kong Mary da u Managing Director And Co-founder jong ka Blind Lead Trust Organization u Bah Jitendra Dkhar ha jingïalang ha ka Sngi Saitjaiñ.
Ïa ka jingïalang la pynïaid da u Secretary ka Lead Trust Organization u Bah Wompherheimonki Lamare bad la ïoh ka jingkren na u Bah Chwa Kyndait uba dei u bahaïing ka Kong Mary ha ka jingdonlang u Waheh Shnong u Bah Bhalang Dkhar, ki katto katne ki nongshong shnong bad ki bahaïing hasem ka Kong Mary.
U Bah Jitendra ha ka jingkren u la ong ïa ka Lead Trust Organization la seng ha u snem 2018 halor ka nongrim ba ka kwah ba baroh kiba duna dkhot met kin ïeng ha la ki jong ki kjat bad lada ki tyngkhuh ïa kino kino ki jingeh kin dei ma ki hi, ki ban wad ki lad ki lynti kumno ban pynbeit ïa kita ki jingeh katkum ka jinglah ka jong ki.
U la ong hashwa ba ki dkhot bad nongïalam ka seng kin ïakynduh ïa ka Kong Mary, ki la ïohsngew ïa ka khubor ba ka shem jingeh jingjynjar bad kum ki briew kiba juh tyngkhuh ïa kum kine kijuh ki jingeh ha ka jingim kaba man la ka sngi, bad ki sngewthuh katno ka long kaba eh ïa ka.
U la ong ruh ba hadien ka jingshong jingïalang ka seng ka rai ban jurip ïa kane ka longïing bad la lap shisha ba ka Kong Mary ka im ha ka jingkordit bad ka donkam kyrkieh ban ïoh ïa ka ïing kaba bha. Kumta ka seng ka la shim ïa ka sien jam ban ïarap pynlut pynsep bad ban pynïoh da ka ïing kaba bha, tang ba kan ïoh ban rieh tngen shwa.
U Bah Jitendra u la pynpaw ruh ka jingkmen ïa ki bahaïing hasem, ki paralok parajor bad ki nongshong shnong ka Krem Myrsiang kiba la synñiang bad ai jingïarap, la ka long da ka bor met ne da ka pisa.
U la kyntu ïa ki nongshong shnong bad ïa ka imlang sahlang ba ym dei ban peit poh ne ibeiñ ïa ki briew kiba don jingduna ha ki dkhot met namar ki ruh ki don kajuh ka hok kumba long lem kiwei ki briew kiba dap ba biang.
Nalorkata u la kyntu ruh ïa ki Dorbar Shnong ban ai bynta lem ïa kiba duna dkhot ha kino kino ki kam shnong kam thaw namar ki ruh ki don ka sap kumba la bynta da U Blei.
U Bah Dawan Lyngdoh u la ong shisien pyrkhat kiba duna dkhot khamtam ki bym lah ban ïohi ki lah ban ïarap bad shna kylliang para ma ki, lada kiba dap ba biang ka met ka phad lada ki don kajuh ka thong, u ngeit ba ka imlang sahlang kan nym mad bad tyngkhuh ïa ki jingeh bad jingduh jingduk.
