Shillong, Jymmang 07:
Ka Umsning Area Headman Forum ka la pynrem jur ïa ka jingleh sting jong ka National Highways Authority of India (NHAI) ha ka por ba maramot surok ha Umtrew da kaba duna ki jingpyni dak ba dang maramot ïa kawei ka surok bad ban ïaid tang na kawei ka ‘two lane’ ha jaka ka ‘four lane’.
Ha u kyrwoh khubor, u Bah Frankie Nongrum, Convener jong ka Forum, u la ong ba na ka jingleh sting ka NHAI, ha ka Sngi Saitjaiñ ka la don ka jingtakhuh kali ha Umtrew.
Na ka liang ka Forum ka la dawa ïa ka bai lutksan na ka bynta ki trai kali bad kiba la mynsaw, bad ka la kyntu ïa ki nongtrei ha man ki dong ba kin buh dak ne Signal ba ki kali kin ïaid beit la ka jong ka liang khnang ban lait ki jingjia ba sngewsih.
