Shillong, Jymmang 07:
Ka National People’s Party (NPP) ka la rai ban pynwai noh ïa ka Block NPP ha ki ar tylli ki konstitwensi, kita, ha Mawkynrew bad Sohra konstitwensi da ka jingwan ïalong kawei noh ka People’s Democratic Front (PDF).
Ïa kane la pynbna da u National Vice President ka NPP u Bah Prestone Tynsong uba dei ruh u Symbud Myntri Rangbah ka Jylla haba ai jingkren ha ka sngi ba pdiang burom ïa ki ar ngut ki MLA ka PDF, u Bah Gavin Miguel Mylliem bad u Bah Banteidor Lyngdoh lem bad ki nongkitkam bad nongkyrshan ka PDF kiba la ïalong kawei bad ka NPP.
Haba pynbna ïa kane, u Bah Prestone u la ong ba ka NPP Block ha Sohra bad Mawkynrew konstitwensi hap ban pynwai noh hadien ka jingwan ïalong kawei bad yn thaw thymmai ïa ki Block ha kine ki konstitwensi.
Nangta u la ong ba ha ka taïew ban wan ka seng kan sa pynmih ïa ka jingpynbna bad hadien ba la pynwai, yn thaw thymmai ïa ki Block NPP ha kaba ki MLA kiba la wan ban ïalong kawei bad ka NPP kin ïalam kum ki President.
Kane ka mut ba u Bah Gavin un sa long u President ka NPP Sohra Block bad u Bah Banteidor un long u President ka NPP Mawkynrew Block.
Kane ka jingthaw thymmai ïa ka NPP Block ha kine ki konstitwensi khlem pep kan pyndiaw ïa ki nongkitkam ka NPP kiba la don baroh shi katta khamtam ha kane ka ilekshon MLA, 2023.
