Shillong, Jymmang 07:
Kawei ka trok kit umphniang kaba don ïa u nombor AS 26C 3817 ka la kylla ha Mawblei hajan ka petrol pump bad ban ruh ïa ar tylli ki kali rit.
Kane ka la jia ha ka Sngi U Blei ha ka por kumba 10:45 mynstep. Katei ka trok ka dei kaba dang wan na Assam ban leit buh umphniang Petrol bad Diesel sha Mawlai. Hynrei mar ïa poi hajan ka Petrol Pump ha Mawblei ka la kylla lyndang bad ban ïa ki ar tylli ki kali kiba dang ïaid.
Hadien katei ka jingjia la pynsangeh shwa ïa ki kali kiba hiar bad kiew khnang ban lait na kino kino ki jingmynsaw namar ka umphniang ka la tuid lut sha surok. Ki kali pynlip ding ruh ki la wan poi ha katei ka jaka ban ïada na kano kano ka jingjia.
Haba ïakren bad u nongñiah katei ka trok kit umphniang u la ong ba ka daw jong ka jingkylla ka long namar ka jingbym treikam shuh u lakam jong ka kali bad kane ka la pynlong ïa u ban leit tynrah ïa ka kynroh. Hynrei ka trok ka la kylla bad ka la ïoh ban pynban ïa artylli ki kali kiba dang ïaid ha katei ka por. Ha kane ka jingjia, ym shym la don satia kino-kino kiba mynsaw.
