Mumbai:
U Ranveer Singh uba la shim bynta ban leit peitkai ia ka Premier League u la pynpaw ia ka jingsngewkmen ban ioh ka lad ban iakynduh markhmat bad ki nong ialehkai kiba paw jong ki por bad snem ba la leit bad kumjuh ruh ki khlur ialehkai jong ki Club bapher bapher. Na ka liang une u tyngshop u sngew ba ka long ka burom ia u ban leit peitkai ia ka Premier League namar ba u long ialade u briew uba sngewtynnad bha ia ka Football.
Ha ka jingleit peitkai ia ka Premier League u Ranveer ula ioh ruh ban shong ha ka jingialang kaba la pynlong da u Manager barim jong ka Club Aston Villa, u nong ialehkai sha khmat jong ka Leicester City u Kelechi Iheanacho bad kumjuh ruh bad u Fulham Winger Willian.
Nalor kane u Ranveer ula ioh ban iakynduh markhmat bad u Carlton Cole uba dei uwei na ki nongialehkai ha ka Premier League bad ioh lad ruh ban peitkai ia ki dkhot ka kynhun West Ham ha ka por ba ki dang don ha ka jinghikai.
U Ranveer uba long u nongrah ktien jong ka Premier League ha India, u sngew ba ka don ka jing myntoi bad jingioh nong ia u ban shah thung kum u nongrah ktien namar ba u ioh ia ka lad ban iakynduh bad ki khlur ialehkai Football jong ki kynhun bapher bapher ka England.
Ha ka jingwan peitkai ia ka Premier League u Ranveer u la ioh ia ka lad ban sakhi ia ka jinglehkai kaba la long hapdeng ka Fulham bad Manchester City, Leicester City bad Everton bad hadien kane ula leit sha Emirates ban peit ia ka jingialehkai kaba la long hapdeng ka Arse- nal pyrshah ia ka Chelsea.
