Shillong, Jymmang 08:
Ka Federation of Ri-War Mihngi Local Dorbar (FRMLD) ka la ong ba ka jingshah siat u Bah Ronning Nongkynrih ha ka miet jong ka 5 tarik mynta u bnai hajan Mawshun ka dei ka jingshah hiar thma ki Khasi ha ki BSF.
“Kumba ïohi mynta, ka jingsiat kam dei ka suk ka saiñ, ka jingsiat ka dei ka thma. Shisien ba u briew u la siat da ka suloi, ka la dei ka thma…kaba mut ka jaidbynriew jong ngi ka shah hiar thma mynta. Ka seng ka hap mih ban pyrshah ïa kane namar kane ka dei ka jinghiar thma jong ki BSF ïa ngi ki Khasi,” la ong u Publicity Secretary ka FRMLD, Bah Edmund Khongngai haba kren sha ki lad pathai khubor ha ka Lah Sngi U Blei.
U la ong ruh ba ka seng kaba la shong ïa ka jingïalang ha ka step Lah Sngi U Blei ka la shim ïa ka rai ban ïakynduh ïa u SDO ka Pynursla kumjuh ban pynlong ïa ki jingïakhih khnang ban wanrah ïa ka jingbishar hok halor ka jingshah siat ïap u Bah Ronning Nongkynrih ha ki BSF ha ka miet 5 tarik mynta u bnai hajan Mawshun.
Ka seng ka kyrpad ïa u MLA ka thaiñ, uba long ruh u Symbud Myntri Rangbah ka Jylla, Bah Prestone Tynsong ban shimkhia lem halor katei ka bynta khamtam ka jingmad jingeh ha ki jaka khappud ha kiba bun ki liang.
“Kam dei kaba tang shisien, na ka por sha ka por ka ju jia, lehse ka jingjia kaba kham khraw ka dei ka jingsiat, ym dei ka jingsiat ïa u briew ha khappud hynrei ka jingkiew jong ki BSF shaduh sha shnong Mawshun. Ka Mawshun ka jngai kumba 15 km na khappud…te une u shipai u kiew sha shnong briew, bad ban shu siat te ka bym lah ban long,” la ong u Bah Khongngai.
Haba pynrem jur ïa katei ka jingjia, u la ong ba ka FRMLD ha ryngkat ka jingïasnoh kti lang bad ki kynhun seng bapher-bapher kan sa hiar sha khappud ban ïamir jingmut bad ki nongïalam shnong kumjuh bad ki nongïalam Raid ban shimkhia halor kane ka mat.
“Lada ngi sngap, lehse kan sa nang ïai jia ha ki sngi ki por ban wan ïa ki paradoh-parasnam bad khamtam ïa ki nongshong shnong jong ngi ha khappud,” u la ong.
Haba kylli, utei u nongïalam u la ong ba ka seng kam tip satia u Bah Nongkynrih u kit mar aïu namar kam shym la ïohi ïa kita ki masi ha kali haba ki nongïalam ka seng ki leit sha katei ka jaka ha ka por mynstep.
“Lada u kit ïa kita ki masi ruh, balei ban hap da siat ïa u briew. U ïoh bor naei uta u BSF ban siat ïa ki briew namar shuwa ban siat ïa uno-uno u briew u dei ban ïoh ïa ka hukum. Mynta ka jingkylli ka long, hato u la ïoh hukum ban siat ïa u briew lada u kit masi,” la buh jingkylli u Bah Khongngai.
Shuh shuh u la bynrap ba lada ka Sorkar kam leh eiei ha kine ki sngi ban wan, ka seng kan shim ïa ka sienjam jong ka jingïakhih lyngba ka Synjuk ki Rangbah Shnong, Synjuk ki Sordar Shnong, Sordar Raid ha ryngkat ka jingïatreilang bad ki shnong ha khappud.
