Shillong, Jymmang 08:
U Myntri Rangbah ka Jylla u Conrad K Sangma u la ïathuh ba jan baroh ki briew na ka Jylla khamtam ki samla pule ki la wanphai na Manipur sha ka Jylla, bad ha kine ki lai sngi, kiba la lah ban wanphai ki la poi kumba 300 ngut.
U Conrad u la ïathuh ïa kane ha ka Lah Sngi U Blei ha kaba u la ong ba ka Sorkar Jylla ka la siew ïa ka bai liengsuiñ bad shim ki lad ki lynti kumno ban wanphai suk ki samla sha ka kajong ka Jylla.
U la ong ba ka kynhun kaba khatduh jong ki samla pule kiba dei ban poi ha Shillong ki la dei ban poi namar ka Sorkar ka la pynbeit ba kin wan da ka liengsuiñ kaba wan beit-beit na Imphal shane.
Nalor kata, u la ong ba ka Sorkar Jylla ka la pynsiew jan baroh ki samla pule kiba wanphai, hynrei lehse ki don ki samla kiba nang sei na la pla namar ki don ki khep ba mih ka jingeh ha kaba ka Sorkar Jylla ka hap bud ïa ka jingbthah ka Sorkar Pdeng bad ym lah ban shu phah hi da ka liengsuiñ kaba ka la dep pynbeit lypa.
U la ong ba namarba hap ban shim da ki liengsuiñ kiba kamai, ka donkam ruh ïa ki samla pule ban nang siew hi lyngba ka jaka kynshew pisa jong ki.
Shuh shuh u la pyntip ba na ka liang ka Sorkar Jylla ka la lah ban pynbeit ïa kane ka jingeh bad lait noh tang katto katne namar ki jingeh kiba don, kumba 99 na ka 100 ki samla pule ka Jylla ki lah ban wanphai sha Meghalaya.
