Shillong, Jymmang 08:
Ka jingïalap ilekshon ha Sohïong konstitwensi ka la poi sha kaba kut ha ka por 4 baje janmiet jong ka 8 tarik Jymmang kaba long 48 kynta shwa ban kut ka jingthep vote ka ban long ha ka 10 tarik Jymmang.
Ha kane ka sngi kut, u kyrtong ka NPP Bah Samlin Malngiang bad u kyrtong ka UDP Bah Synshar Lyngdoh ki la pynlong jingïalang paidbah mar shiliang surok ha ka shnong Mawtap, Sohïong. Kine ki kyrtong ki la wanlam ruh ïa ki nongïalam ba hakhmat ban kren sha ki paidbah bad ha kajuh ka por, ka la don ka jingïarwai, ïashad bad ka kmen ka sngewbha.
Ka jingïalap ilekshon ha kane ka konstitwensi kumba la ïohi ha kine ki khyndiat sngi ka long kaba khluit bha khamtam hadien ba la dep thep kyrteng u kyrtong ka UDP ha ka 18 tarik u Ïaïong.
Ka jingïalap ilekshon ha Sohïong ka dei kaba ïa kynthoh bha hapdeng ka UDP bad ka NPP kiba donlang ha ka Sorkar MDA-II, katba kiwei pat ki seng ki kham kynjah ka rukom ïalap ilekshon.
Ki don hynriew ngut ki kyrtong ha kane ka ilekshon kiba kynthup ïa u Bah Samlin Malngiang na ka NPP, u Bah Synshar Lyngdoh na ka UDP, u Bah S Osborne Kharjana na ka Congress, u Bah Sandondor Ryntathiang na ka HSPDP, u Bah Stodingstar Thabah na ka TMC bad u Bah Serap Eric Kharbuki na ka BJP.
Ha kane ka kajuh ka sngi, naduh ka por 4:00 janmiet ka la dei sa ka pali jong ki ophisar ban leit sha man la ki Polling Station ban pynbit pynbiang ïa baroh ki jingdonkam namar ka jingthep vote ka ban long ha ka 10 tarik Jymmang ban jied ïa u nongmihkhmat sha ka ïingdorbar thawaiñ ka jylla bad ka jingñiew ïa ka vote kan long ha ka 13 tarik Jymmang, 2023.
Kum ban shu pynkynmaw, ka jingpynsangeh ïa ka ilekshon MLA ha Sohïong ka dei namar ka jingkhlad ba kyndit jong u Bah HDR Lyngdoh kum u kyrtong ka UDP ha ka 20 tarik Rymphang, 2023. Kane ka wan jia shi taïew shwa ban thep vote ha ka ilekshon ka ban long ha ka 27 tarik Rymphang, 2023 bad ka Election Commission ka ri India ka la rai ban pynsahteng shwa ïa ka jingjied nongmihkhmat ha katei ka konstitwensi.
Ka Sohïong konstitwensi ka don 34,783 ngut ki nongthep ‘vote’ bad napdeng kine, 17,687 ngut ki dei ki kynthei, bad kine ki nongthep ‘vote’ baroh ki don ha ki 63 tylli ki Polling Station.
