Shillong, Jymmang 08:
U General Secretary ka Khasi Students’ Union (KSU), Sengkmie, samla Donald V. Thabah u la ong ba ka kaiphod kaba mih na ka jingtohkit halor ka jingshah siat ïap u Bah Ronningstar Nongkynrih ka dei ban pynshitom bad set along shi jingim ïa ki BSF kiba donkti ha katei ka kam be-aiñ.
“Ngim lah ban pdiang ïa ka jingleh jong ka BSF kiba thombor ïa ngi na ka por sha ka por. Ki ’riew saiñ pyrthei ki ong ban pynlong ka jingtohkit…ma ngi, ngi ong buh kawei ne 100 tylli ruh ki kynhun tohkit, hynrei to ai ba ka kaiphod kaba mih nangta ka dei ban long ban pynshitom bad set along shi jingim ïa kine ki BSF,” la ong u samla Thabah haba ai jingkren ha ka jingïalang paidbah kaba la long ha Pynursla ha ka Lah Sngi U Blei.
Ïa katei ka jingïalang la pynlong da ka KSU – South Central Circle kum ka jingsdang jong ka jingïakhih ban pyrshah ïa ka jingpynïap beiñ jong ki BSF ïa u Bah Ronningstar Nongkynrih hajan Mawshun ha ka 5 tarik mynta u bnai.
U General Secretary u la ong ba ka seng da lei-lei kam pdiang ban shu sospon lane pynkynriah kam ïa kiba donkti (ha katei ka kam) sha kawei ka jaka.
“Lada ngi kren lei ïa kita ki BSF…na ka por sha ka por ïa ki nong Bangladesh, ki pyllait beit. Naduh u 1971, da ki lak ngut ki nong Bangladesh ki wan rung, phi la kem ne em ïa ki, ki rung na khappud bad ki wan sah ha Shillong,” la ong biang u samla Thabah.
Haba kdew ba kiba bun ki shnong ha Shillong la satah da u mynder suda, u la buh jingkylli ba ki BSF ki leh aïu sha khappud bad balei kim kem ïa kito kiba rung tuh hynrei ïa ki Khasi ki pyndik na ka por sha ka por.
“Ka dei ka kamram jong uwei-pa-uwei, u briew ba biang ka bor pyrkhat, u briew ba don ar tylli ki kjat, ar tylli ki kti, ban mih bad pynkhih win ïa kine ki ktem BSF kiba don ha thaiñ Ri-war namar lada ngi shu sngap ka mut ngin ïai shah siat,” la ong shuh shuh utei u samla nongïalam.
Na ka liang u samla Thabah haba pynpaw ka jingsngewkhia halor katei ka jingjia u la ong ba lada utei u rangbah (Ronning Nongkynrih) u kit masi ne kit muid, haba ki shipai BSF ki don ka jingsuba sniew, ki dei ban bat bad tohkit, bad ym ban siat ïa u.
Shuh shuh u la bynrap ba ai ba ki jingtohkit kin ïaid hynrei dei ban pynïoh ïa ka hok bad ban set along ïa kito ki shipai kiba donkti ha katei ka kam.
“Kane ka long tang ka jingsdang…kane ka dang long kaba jai-jai, ha kiwei pat ki jingïakhih, ka lah ban don ka jingbym shong suk shong shngaiñ lada ngim ïoh ka jubab,” la ong u General Secretary.
