Shillong, Jymmang 08:
Ka Sorkar Jylla ka la pan ïa ka kaiphod kaba bniah halor ka jingjia ba siat ïap ki shipai Border Security Force (BSF) ïa u nongñiah trok hajan ka shnong Mawshun ha ka miet 5 tarik mynta u Jymmang ha ka por 11 baje mynmiet.
U Myntri Rangbah u Conrad K Sangma u la ong ba ka Sorkar Jylla ka la bthah ïa u pulit uba shim ban tohkit (investigating officer) ban lum lut ïa ki jingshisha baroh bad ai ïa ka kaiphod kaba bniah halor kaei kaba la jia.
Kum ban shu pynkynmaw, uwei u nongñiah trok ba la tip kyrteng u Bah Ronning Nongkynrih u la khlad hashen namar ka jingsynreit kuli ki shipai BSF ïa ka trok kit masi kaba ñiah da ma u.
Nalor kata, u la ong ba u Symbud Myntri Rangbah uba peit ïa ka tnat pulit un sa ai jingtip kham bniah.
Namar kane ka jingjia, ki jingpynrem ki la tuid halor ka jingshah siat ïap u Bah Ronning bad na ka liang ka Khasi Students’ Union ruh ka la pynlong ïa ka jingïalang paidbah ha Pynursla ban pynrem bad dawa na ka Sorkar ban pynshitom ïa ki shipai BSF kiba donkti.
