Los Angeles:
Ka Drew Barrymore ka la randien noh kum ka nongpyniaid jong ka MTV Movie & TV Awards 2023 ha kaba ka daw halor kane ka dei kum ka dak jong ka jingai jingkyrshan jong ka ia ka jingiakhih jong ki dkhot ka Writers Guild halor ka jingdawa ba dei ban pyn kiew noh ia ka jingsiew ia ki.
Ka Drew ha ka jingiakren bad ki lad pathai khubor ha kaba iadei bad kane ka la ong ba kum ka dak jong ka jingai jingkyrshan ia ka jingiakhih jong ki dkhot ka Writers Guild kam banse ban randien noh kum ka nongpyniaid jong ka MTV Movie & TV Awards 2023 bad kan sa peit pat ha ki snem ban wan.
Ka Drew ha ka jingshisha ka la dap da ka jingkmen ban long ka nongpyniaid jong katei ka jingsam khusnam hynrei hadien ba la mih ka jing iakhih bajur jong ki dkhot ka Writers Guild ka la shim ia ka rai ban randien noh na kane.
Kane ka puron ba la don 48 snem ka sngew ba kum ka khlur ak phlim ka donkam ia ka ban ai jingkyrshan ia katei ka jing-iakhih namar ba ka sngew ba ki dkhot ka Wtiters Guild ki la iakhih na ka bynta kaba dei ha kaba la bun bun snem mynta ym shim la pynkiew ia ka jingsiew jong ki bad ka shu neh bad long sah kumjuh.
Ka Drew ka la sngap ruh ia kaei kaba la kren da ki dkhot ka Writers Guild bad ka shem ba katno ka ktah ia ka khamtam lei lei ba ka la don khun don kti bad ka sngewthuh ruh ba lada ioh ia ka jingsiew kaba rit ym lah satia ban pyndap pynbiang haiing hasem khamtam lei lei ba mynta ka jingkiewdor ki marbam mardih bad kiwei kiwei ki jingdonkam ka long sha kaba palat.
Ka Drew ka la ai mynsiem ruh ia kiwei kiwei ki khlur ak phlim ba kin kyrshan lem ia kane ka jing iakhih jong ki dkhot ka Writers Guild bad ong ba lehse da ka jingiasnohkti lang jong baroh yn sa sngap bad shah shkor bad pynurlong ruh ia ki jingdawai jong ki.
Bun ki show ha TV la hap ban pynsangeh noh shwa na ka daw jong katei ka jingiakhih kum ka dak ban ai jingkyrshah ia ki nongthoh khana jong ki phlim bad ki show ha TV.
