Shillong, Jymmang 08:
U Bah Erwin K Syiem Sutnga uba dei u nongïasaid aiñ ba paw ka jylla u la leit ban ujor da ka ejahar ha ka 7 tarik u Jymmang, 2023 ha u pulit ba peit ïa ka thanat Sadar ha Shillong halor ka jingpynsaphriang ha ki rynsan social media ïa ka Documentary “The Shillong File: Core Issues Ep. 97” kaba la thaw ïa ka jingsngew pynïapher jaitbynriew bad ka jingsngew pynïapher ñiam.
Katkum katei ka ejahar ba la mudui, u Bah Erwin u la ong ba lyngba katei ka jingpynsaphriang ïa katei ka Documentary kaba la pyndonkam bakla ha ki jingjia bapher bapher ka la pynlong kum kata ka jingsngew ïapher hapdeng ki paid riewngeit Hindu bad Khristan bad ba la leh khnang ban pyndon ïa ka jingmut ba ka don ka jingthombor ïa ki riewngeit Hindu kiba shong ba sah hapoh ka jylla Meghalaya khamtam ha Shillong ha kaba kum kane ka jingjia kam don satia bad ïa katei ka Shillong Files ka la pynlong bad pynmih ïa ka jingsngewthuh bakla kaba long ruh kum ka jingpynjah burom ïa ki riewngeit Khristan jong ka jylla.
Shuh shuh katkum katei ka ejahar, la ong ruh ba kane kan dang ïai pynsniew ïa ka rukom long rukom man bad ka jingisih ñiam hapoh ka Ri India bad kan buh ruh ka jingma kaba lah ban poi sha ka huri hura hapdeng ki nongshong shnong ka jylla Meghalaya kiba dei ki riewngeit Khristan bad ki riewngeit Hindu ha kaba mynta ki im bad ki shongsuk hapoh ka jylla.
Lyngba katei ka jingujor, u Bah Erwin u la kyrpad ïa ka tnat pulit ba kan shimkhia halor kane bad ban register case halor kito kiba donkti ban pynsaphriang ïa katei ka ‘Documentary’ ha ki rynsan social media bad ba dei ban kem ïa ki trai bad ïa ki nongpynïaid lane ki ‘Anchor’ jong katei ka ‘Documentary’ bad ïa katei ka documentary “The Shillong File: Core Issues Ep. 97” dei ban weng mardor ïa ka khnang ban ïada ïa ki nongshong shnong ka jylla Meghalaya kiba shong ba sah shabar ka jylla ba kin lait na kano kano ka jingshah peit khmat bad ka jingshah thombor.
