Jowai, Jymmang 08:
Ka 3 tarik u Nohphrah,2022 ka long ka sngi jong ka jingkmen ïa ki paidbah jong ka nongbah Jowai namar ha kane ka sngi ki paidbah ki la sngew kumba ki ïoh artylli ki jingai sngewbha kiba khraw ha kajuh ka sngi na ka sorkar Jylla.
Hynrei phewse, kine ki jingai sngewbha baroh artylli ki la kylla long ki jingai sngewbha ha ka jingruma namar baroh artylli ki long ha rngai haduh mynta mynne.
San tylli ki bnai ki la ïaid hadien ka jingwan buh nongrim ban tei ïa ka mini secretariat ha Jowai, hynrei haduh mynta kam pat shym la don kano kano ka dak ka shin jong ka jingtei ïa katei ka mini secretariat.
Nalorkata, san tylli ki bnai ki la her ba la plie paidbah ïa ka MCH Hospital Jowai, hynrei haduh mynta mynne ka dang don da ka tala ha katei ka khyrdop.
Kum ban shu pynkynmaw paidbah, ha ka 3 tarik Nohprah, 2022 u Myntri Rangbah ka Jylla u Conrad K Sangma u la plie paidbah ïa ka 100 Beded Maternal & Child Health Hospital kaba don ha Panaliar bad buh ruh ïa u mawnongrim ban tei ïa ka Integrated Development Complex (Mini Secretariat) ha ka jingïalang kaba la long ha phyllaw ka PWD, Jowai.
Kane Integrated Development Complex (Mini Secretariat) kaba yn tip noh da ka District Secretariat la mang ban tei ha ka jinglut kumba T.19,83,43,067/- bad la mang kumba T.20 klur da ka GAD jong ka sorkar jylla bad shen ka jingpyntrei kan sdang noh ha PWD North Division kaba ha Ladthadlaboh, Jowal, West Jaintia Hills District.
Ka jingtei ka long da ka G+3 Storey Building kaba don lai bynta ka Block (East, West bad North Block) kaba ban kot haduh 40 klur tyngka haka jingheh ka jaka kaba 14,700 sqm lane 3.63 Akar.
Ka MCH Hospital kam shym la treikam noh ha ka sngi kaba bud namar ba ym pat thung satia ïa ki doktor bad ym shym la biang satia ki jingdonkam.
Ki paidbah ka nongbah Jowai ki la shu ïai ap khmih lynti ba lashai ka sngi kan treikam noh hynrei kata ka lashai kam shym wan satia wat haba la ïaid palat 150 tylli tam kita ki lashai.
