Kolkata:
Ka ‘Kerala Story’ kaba long kawei na ki phlim kaba la shah kynthoh bad shah khanglad ban pynmih la ioh khubor ba ka sorkar West Bengal kum shi bynta ban pyllait na kano kano ka jingjia ba sngewsih na ka daw jong katei ka phlim ka la shim ia ka rai ban khanglad ban pynmih bad pyllait paidbah ia ka ha kaba ka Myntri Rangbah jong kane ka jylla ka la ai jing tip sha u Chief Secretary ba ym dei ban shah ban pyni ia ka ha ki rynsan.
Ha ka sngi nyngkong ka sorkar West Bengal ka la shim ia kane ka rai ha kaba kam banse ban hap khang ban pyni ia ka hadien ba ka la iohi ia ka jingiakhih jong kiba bun ki nongshong shnong ha kylleng ka ri na ka daw jong kane.
Ka Mamta Banerjee ha ka jingiakren bad ki lad pathai khubor halor ka jingkhang ia ka Kerala Story ha West Bengal ka la ong ba ka la shim ia kane ka rai na ka daw ba kam kwah ba kan don ne mih ka jingsngewpher jaitbynriew.
Shuh shuh ka Mamta ka la kren shai ba kam kwah ba tang na ka daw jong ka phlim kan mih ka jingumsnam ha ka jylla West Bengal bad dei ruh na kane ka daw ba ka la leh ia kaei kaei ba ka sngewdei bad na ka bynta ka shongsuk shong shngaiñ.
Hynrei kane ka jing leh jong ka Mamta ka la pynlong ia u President ka seng BJP jong ka West Bengal u Sukanta Majum dar ban pynrem jur da kaba pynpaw ba ka seng BJP kam kwah ban pyni ia ka jingshisha bad ka kwah ban buh rieh ia kaei kaba la jia.
Ka Kerala Story ka long kawei na ki phlim kaba iathuh ia ka jingshisha bad la lam khmat ia kane ka phlim da ka Adah Sharma bad ka khana ka dei halor ka jingleit rung ki samla na ka niam Hindu bad Khristan kum ki dkhot jong ka Islamic State.
Ha kane ka phlim la kynnoh ba kito ki kynthei kiba la leit ban pyniasoh bad katei ka kynhun kieng atiar ki dei kiba shu shah pynrung jubor sha ka niam Islam bad hadien la phah ia ki sha Afgha nistan, Yemen bad Syria ban iakhun na ka bynta ka niam Islam.
Kane ka phlim ka la mad ia ka jingshah kynthoh na kiba bun ki seng bad ki kynhun niam bapher bapher ba don ha kane ka ri bad wat ha Kerala ia kane ka phlim la khanglad ban pynmih hynrei hadien ba ka iingbishar ka la peit bad khmih bniah halor ka khana jong kane ka phlim kam shim la khang satia ban pynmih.
