Los Angeles:
Kawei ka website ka la thong ban ai haduh $1000 ia ki briew lada ki lah ban peit ia baroh ki bynta jong ka phlim Fast and Furious. Kino-kino kiba lah ban leh ia kane kin sa ioh ia katei ka pisa kaba la thong da katei ka website.
Kane ka website kaba la tip da Finance Buzz ka la leh khnang ia kane ban pynsngewtynnad ia ki paidbah bad nalor kane ka la buh ruh kawei ka kyndon na ka bynta kito kiba thmu ban peit ia baroh ki bynta jong katei ka phlim ba kin hap ban thoh ia ki aksiden ne ka jingshah pynjulor jong ki kali ha man kawei pa kawei ka bynta jong kitei ki phlim.
Shuh shuh ka khubor ka iathuh ruh ba kane ka kompani ka la phah ruh ia ki briew kiba kwah ban ioh ia katei ka pisa ba kin hap ruh ban tip ki kali aiu kiba la shah pynjulor ha man kawei pa kawei ka bynta jong ka Fast and Furious bad kito kiba lah ban ai ka jubab ba dei kin ioh ia katei ka pisa.
Kane ka jingleh jong ka FinanceBuzz ka la long ruh ha shwa ka jingpyllait paidbah ia ka Fast X ka ban long ha ka 19 tarik mynta u bnai.
Ki hehduh ka Finance Buzz ha ka jingiakren bad ki lad pathai khubor ki la ong ba ki dang wad ia ki briew kiba lah ban peit lut ia baroh ki bynta jong ka Fast and Furious bad kwah ruh ban tip haduh katno ki itynnad bad thrang ban peitkai ia baroh ki bynta katei ka phlim.
La ai por haduh 20 kynta ban peit ia baroh kitei ki phlim bad ban thoh ruh ia kaei kaba la jia ha baroh ki bynta bad ban jer kyrteng ruh ia ki kali kiba la shah pynjulor na ka jingmareh thong.
La ailad ruh ia ki paidbah kiba kwah ban shim bynta ha kane ba kin phah ia ki kyrteng jong ki ha shwa ka 19 tarik mynta u bnai bad yn sa pynbna pat ia ka kyrteng jong ki nongjop haduh ka 26.
Haba iakren halor ka Fast X kane kan dei ka bynta ba 10 jong ka Fast and Furious bad la direk da u Louis Leterrier bad kiba la shim bynta ki long u Vin Diesel uba la ak kum u Dom Toretto, Jason Momoa kum u Dan te Reyes, Jason Statham, John Cena, Brie Larson, Tyrese Gibson, Ludacris, Jordana Brewster, Natha lie Emmanuel, Sung Kang, Scott Eastwood, Michael Rooker, Daniela Melch ior, Alan Ritchson, Helen Mirren bad Cardi B.
