Mumbai:
Uwei na ki nongshna phlim ba paw ka Bollywood u Madhur Bhandar kar u la kren halor kito ki briew kiba la pyrshah bad khanglad ban pynmih bad pyllait paidbah ia ki phlim Bollywood da kaba ong ba kito kiba pyrshah dei kito hi kiba la peit nyngkong eh ia kino kino ki phlim kiba la pyni ha rynsan.
U Madhur u sngew ba ka jingpyrshah jong ki katto katne ban pyni bad pynmih ia ki phlim Bollywood ka long kaei kaei kaba pynjah burom pynban ia pyrshah dei ma ki hi kiba la leit ban peit nyngkong eh ia kito ki phlim kiba la phah ban Boycott.
Une u nongshna phlim u la pynrem jur ia kito ki briew kiba la ai mynsiem ia kiwei kiwei ban pyrshah ban pynmih ia ki katto katne ki phlim Bollywood da kaba ong ba kane ka pyni bad pynpaw ia ka jinglong bieit jong ki.
U Madhur u la ban jur ba wat lada ki don kumba katto katne ki phlim kiba la mad ia ka jingduhnong na ka daw jong ka jingshah kyntait (Boycott) pynban don pat kiba wat hadien ka jingshah kyntait ki la kamai bha pynban ha ka Box Office ha kaba kine ki long kum ka Gangubai Kathiawadi bad ka Brahmastra.
Ha kajuh ka por u la ai jingiaroh ia ka Pathaan da kaba ong ruh ba kane ka phlim ka la pyni ka nuksa kaba bha sha kiba bun ba wat hadien ka jingshah pyrshah bad jingshah khanglad pynban ka la long kawei na ki phlim kaba la kamai bha ym tang ha India hynrei wat sha kiwei kiwei ki ri ka pyrthei.
U Madhur u kyrmen skhem bad khmih lynti ruh ba nangne sha khmat ki paidbah kin ym shah ialam bakla shuh ha ki riewshim kabu bad ba kin leit ban peitkai ia ki phlim kiba la pyni ha ki rynsan.
Une u nongshna phlim u kyrmen skhem ruh ba ka Bollywood kan pynmih ia ki phlim ba itynnad ha kine ki snem ban wan ka ban khring ia ki nongpeitkai.
