Tehran:
Ar ngut ki puron ka Iran ki la shah daiñ kuna tang na ka daw ba kim shym la deng ia ka Hijab namar ka Iran ka dei kawei na ki ri Muslim kaba pyrkhing bha halor shibun kiei kiei bad khamtam lei lei haba iadei bad ka niam Islam.
Ki lad pathai khubor ki iathuh ba hadien ba lap ia kitei ar ngut ki puron kane ka ri ba kim shym la phong ia ka Hijab kaba dei katkum ka niam ka rukom jong ki kynthei Muslim la kem bad la daiñ kuna ia ki.
La ong ba katba dang iaid ki por ha Iran la sakhi ba bun na ki kynthei kim shym la kwah shuh ban pyndonkam ia ka Hijab. Kum shi bynta ban khang lad ia ki kynthei ba kin bud tynneng ia ka rukom riam jong kiwei ki kynthei ha ka pyrthei, ka sorkar ka la buh da kawei ka kyndon kaba pyrkhing bha bad kane ka long ban kem bad ban set patok bad ban daiñ kuna ruh.
Naduh ba ka sorkar ka la pyrkhing ha kaba iadei bad kane, bun ki kynthei kiba la pynkhein ia kane ka aiñ bad kyndon ba la buh ki la shah kem bad shah set patok bad la sakhi ruh ba ki patok ha Iran mynta ki la khapngiah da ka jingshah kem jong ki nongpynkheiñ aiñ.
Katkum ka khubor ba la ioh kine ar ngut ki kynthei kiba la pynkheiñ aiñ ki long ka Baran Kosari kaba la 37 snem bad ka Shaghayegh Dehghan 44 bad kine arngut ki dei kiba la ak ha ki phlim ba la pynmih da ka Iranian Cinema.
La iathuh ba ka jingbym pyndonkam jong kine ar ngut ia ka Hijab ka la pynbitar bha ia ki pulit kiba la leit ban kem bad set patok ia ki bad shah dain kuna ruh.Ia ka Kosari la kem ha ka por ba ka la leit ban shim bynta ha ka jingleh burom khatduh ia u Hesam Mahm oudi ha kaba kam shim la deng ia ka Hijab bad ia ka Dehghan pat ba ka la rung ha kawei ka Café khlem deng ia ka.
Mynta u snem ka la don ruh ka jingujor ia ki puron kum ka Katayoun Riahi, Pantea Bahram, Afsaneh Baygan bad Fatemeh Motamed-Aria ba ki la sangeh ban deng ia ka Hijab bad kine ki dei ruh ki kynthei kiba la iohpdiang khusnam halor ki phlim ba ki ak bad shim bynta.
