Los Angeles:
Ka Amber Heard ka la mih noh na Hollywood ban leit shong leit sah sha Spain bad kane ka la jia ruh hadien ba kane ka puron ka la rem noh ha ka mokotduma pyrshah ia u Johnny Depp. Ka Amber lem bad i khun kynthei jong ka, i Oonagh Paige ki la leit ban sah sha Madrid, Spain ha kaba kane ka la jia hadien ba kane ka puron kam sngew don jingmut shuh ban sah ha Hollywood naba ka kam ak phlim jong ka mynta ka la kut bad bun ki direktor bad nongpynmih phlim kim kwah shuh ban iatreilang bad ka.
Ki khubor ki iathuh ba ka Amber ka sngew ruh ba ka Hollywood kam long satia ka jaka kaba biang na ka bynta ba kan pynheh pynsan ia la i jong i khun bad dei ruh na kane ka daw ba ka la jied da ka Spain kum ka jaka ba kan pynheh pynsan ia i.
Ka Amber kaba nang bha ban kren ia ka ktien Spanish ka don jingkyrmen bad khmih lynti ba lehse ha ki snem ban wan ynda kaei kaba la jia halor jong ka bad u Depp la klet da baroh kan sa ioh hi ka lad ban wanphai biang sha Hollywood.
Kane ka puron ka la die noh ia ka iing jong ka, kaba don ha Yucca Valley California ha u Naitung 2022 bad naduh u snem ba la leit ka la pynlut ia ka por jong ka ha Spain.
Ka jingai mokotduma ka Amber ia u Depp ka la ktah shisha ia ka ha kaba kane ka puron mynta kam lah shuh ban siew ia ka mynrain khmat sha u Depp.
