Mumbai:
U Dino Morea ula kren halor ka jingshem jingeh jong ki Model kane ka juk bad por ba mynta ban ioh rung ak phlim ha Bolly wood ha kaba une u tyngshop uba long ialade u Supermodel u sngew ba ha ki snem ba la leit ka long kaba suk ia ki Model ban ioh bsuh kjat ha kane ka karkhana hynrei mynta pat ki Model ki shem jingeh bha ban ioh rung sha kane ka karkhana.
Ha ki por ba la leit ki Model kum ka Bipasha Basu, Priyanka Chopra, Katrina Kaif, John Abraham, Milind Soman, Dino Morea, Arjun Rampal bad Deepika Padukone kim shim don jingeh eiei ruh ban rung sha Bollywood hynrei ki Model jong kane ka juk ba mynta pat wat lada ki thrang ban ioh don bynta badka Bollywood hynrei ka lad ka lynti kam shim la plie na ka bynta jong ki.
U Dino uba la rung ak phlim ha u 1999 u sngew ba katba dang iaid ki por ki samla kiba don sap ha ka kam ak phlim ki la trei shitom ban ioh rung ha katei ka karkhana bad pynpaw pyrthei ialade bad ki Model pat ki la shah iehnoh shadien.
U Dino ula iathuh ruh ba ha ki por ba la leit ki nongshna phlim bad ki direktor ki ju wan tyrwa phlim hi ia ki Model hynrei mynta kane ka la kylla khongpong.
U Dino uba la iohrah ia ka Gladrags Manhunt and Megamodel contest ha u 1995, u sngew ba ka jingkwah jong ki Model ban rung sha ka kam ak phlim ka long namar ba ym don lad don lynti ia ki da kiwei kiwei.
