Mumbai:
Ka khubor na Bolly wood ka iathuh ba ka phlim thymmai jong ka Kangana, ka Tejas yn sa pyllait paidbah noh ha u Naitung lane Nailar ha kaba kane kan dei ruh kawei na ki phlim iashoh jong katei ka puron.
Ka Tejas kan dei ka phlim kaba yn pynmih da u Ronnie Screwvala bad kane ka phlim kan dei ruh halor ka Indian Airforce.
La direk ia ka da u Sarvesh Mewara bad ha kane ka phlim ka Kangana kan ak kum kawei na ki Airforce kynthei. Ka daw ba la shna bad pynmih ia kane ka phlim ka dei ruh ban ai mynsiem ia ki samla kynthei kiba kwah ban long ki Airforce.
Ha kaba iadei bad ka bynta jong kane ka phlim ka Kangana ka la trei shitom bha bad kam kwah satia ba kane ka phlim kan mad ia ka jingduhnong kumba long ka Thalaivii bad Dhaakad.
Kane ka long ruh ka wei na ki phlim ba pher jong ka Kangana bad bunsien hi ngin shem ia ka Kangana ba ka pynpher ia ka rukom ak jong ka ha ki phlim khnang ba kin ym iasyriem ne long kumjuh.
Ka dei ruh kawei na ki puron ka bym ju salia ban shim ia kino kino ki bynta ban ak bad dei ruh na kane ka daw ba ka la kiew bha ha ka kam ba ka trei bad don kyrteng ruh ha ka thup jong ki puron ba ioh ia ka jingsiew baheh.
Nalor jong kane ka phlim ia ka Kangana ngin sa iohi ruh ha kiwei kiwei phlim thymmai kiba yn pynmih mynta u snem bad don pat ki ban mih haduh u snem ban wan.
