Los Angeles:
Ka khubor ba la ioh ka iathuh ba ka kompani Adidas ka la shim ia ka rai ban shu ai sngewbha noh sha ki briew kiba duk ia ki ‘Yeezy Shoes’ ha jaka ban thang noh ia ki. Kane ka wan hadien ba ia kitei ki juti ym shym la lah ban pyniaid iew ne ban die hadien ba kane ka kompani ka la pynkut noh ia ka jingteh lok bad u Kanye West tang namar ki jingkren jong u kiba la kynthoh bad pynrem da kiba bun ki nongshong shnong jong ki ri ka pyrthei.
Ha ka jingshisha ka kompani Adidas ka la rai ban shu thang noh ia kitei ki juti kiba ym shim lah ban pyniaid hynrei kylla ktien pat hadien da kaba rai ban shu ai sngewbha noh ia ki sha ki briew kiba ym kot bor satia ban thied ia kitei ki juti bad kumjuh ruh sha kiba duk bad kyrduh.
Ha kine ki snem ba la leit ka Adidas ka la iateh lok bad u Kanye hynrei dei namar ki jingkren bad kijingleh jong une u nong rwai bad ha kajuh ka por ki jingkynthoh jong u halor kawei ka jingjia ba bun ki la rai ban boycott noh ia kiei kiei kiba la pynmih da une u nongrwai.
Ka jingkren bad jing kynthoh jong u Kanye ka la pynlong ia ka Adidas ban mad ia ka jingduhnong bakhraw bha ha kaba katei ka kompani ka la sahkut haduh phew hajar tylli ki juti Yeezy khlem da lah shuh ban pyniaid iew ia ki.
Ka jingbym lah ban die ia kitei ki juti ka la pynlong ia ki bor ba dei peit jong kane ka kompani nyngkong ban shu thang noh syndon ia ki hynrei dei pat hadien ba la rai ban shu ai sngewbha noh sha ki briew kiba duk bad kyrduh ba kin iohlad ban phong ia ki.
Ha ka jingshisha ka Adidas kam kwah satia ban pynkut ia ka jingiateh lok bad u Kanye hynrei namar ba kiei kiei kiba une u nongrwai u kren ka la ktah ia ka jingsngew jong kiba bun bad dei ruh na kane ka daw ba kane ka kompani khnang ban lait na ka jingshah ktah kam banse ban hap pynkut noh syndon ka jingiadei kam bad ka Yeezy.
