Mumbai:
Ka PVR INOX Limited ka la mad ia ka jingduhnong bakhraw na ka daw jong ka jingbym iaid ki katto katne ki phlim ba ka pynmih ha kaba kane ka kompani naduh u snem ba la leit ka la sakhi ba ki phlim ba ka la pynmih kim shim lah satia ban kamai bha ha ka Box Office kumba long kiwei kiwei ki phlim ka Bollywood.
Ka kaiphod ba la pynmih da kane ka kompani ka pyni bad kdew ba ka PVR INOX Limited ka la duhnong haduh 333.37 klur ha kaba kane ka dei haduh ka 31 u Lber 2023.
Ki khubor ba la iohlum ki iathuh ba lada kane ka kompani ka iai mad ia ka jingduhnong kumne kumba ka long mynta ym slem shuh ba kane ka kompani kan hap ban khang noh.
Wat lada ki don hi kumba katto katne ki phlim ba la pynmih da kane ka kompani kiba la khring ia ki nongpeitkai bad kumjuh ruh kamai bha ha ka Box Office pynban bun pat ki dei kiba flop.
Ka PVR INOX Limited ka la shu kham iohnong tang na ka Pathaan kaba la pynmih ha u Kyllalyngkot bad kumjuh ruh ka Avatar: Way of Water ha u Nohprah ha kaba u bnai Rymphang haduh Lber ym shim don kawei ruh ka phlim jong kane ka kompani ka ban leh bha ne ka ban khring ia ki no ngpeitkai.
Ha kajuh ka por ki la don ruh kiwei kiwei ki phlim ba la pynmih da kane ka kompani kiba la shu leh bha tang malu-mala ha kaba kine ki long ruh Tu Jhoothi Main Makkaar bad Bholaa bad ki phlim kum ka Selfiee bad Shehzada pat ki dei kiba flop bha.
Hadien ka jingduhnong kaba la ktah bha ia kane ka kompani pynmih phlim ki hehduh jong ka ki la shim ia ka rai ban khmih bad peit bniah noh ia kino ki phlim kiba i biang ban pynmih bad ki ban long ruh ka jingmyntoi bad ka jingiohnong ia kane ka kompani.
