Shillong, Jylliew 05:
U State President ka Bharatiya Janata Party (BJP), Bah Ernest Mawrie ha ka Lah Sngi U Blei u la ong ba jingpynbeit pud hapdeng ka Meghalaya bad Assam ka la poi sha ka 60%.
Haba kren sha ki lad pathai khubor, u Bah Mawrie u la ong ba hadien ba u Narendra Modi u la shimti kum u Myntri Rangbahduh ka ri ha ka sien kaba ar, u la ban jur halor ka jingpynbeit pud hapdeng ki Jylla ka Thaiñ Shatei Lam Mihngi.
U la ong ruh ba u Myntri ka tnad kam pohïing ka Sorkar Pdeng, u Amit Shah u la bthah ïa ki Myntri Rangbah ka thaiñ ba kynthup ïa u Myntri Rangbah ka Assam ban pynbeit ïa ki jingkajia pud bad ki Jylla ba marjan ha ryngkat ka jingbuh por.
U President u la ong ruh ba wat la ka Congress ha kine ki 50 snem ba la dep ka la synshar ha Meghalaya bad Assam bad wat ha ka Sorkar Pdeng, ka kren ïa ka mat halor u pud u sam tang na bynta ka jingmyntoi saiñ pyrthei.
Haba pynpaw ka jingsngewnguh ïa u Myntri Rangbah ka Jylla, u Conrad K. Sangma lem bad u Myntri Rangbah ka Assam, u Himanta Biswa Sarma, u Bah Mawrie u la ong, “Ha ka por kaba lyngkot eh, la lah ban pynbeit ïa 6 na 12 tylli ki jaka hapdeng ka Assam and Meghalaya.”
Ha kajuh ka por, haba kubur ba ki dang don ki jingïakajia barit baria ha katto-katne ki jaka, u la ong ba ki nongïalam na baroh 2 Jylla ki trei minot bad pynbeit noh shi syndon ïa kane ka mat.
“Kumta ngi lah ban ong ba 60% na ki jingïakajia pud hapdeng ka Assam bad Meghalaya la dep ban pynbeit bad nga khmih lynti ba hapoh une u snem, ka Assam bad Meghalaya kin sa lah ban pynbeit noh 100% ïa ka jingïakajia pud hapdeng jong ki,” u la ong.
Halor ka jingbymhun ka jingpynbeit pud ha ka kylla banyngkong, u Bah Mawrie u la ong ba ka Sorkar ka la ai por ha shuwa ba kan shim rai haba ïadei bad ka kylla banyngkong bad kumta ki paidbah ki la dei ban wan shakhmat ban ai jingmut bad pynsngew sha ka Sorkar ha katei ka por.
“Mynta ïa ka soskular la dep soi, ai ba ka Sorkar kan rai. Ngi la ai jingmut ïa ka Sorkar ba kan shim ruh ïa ki kot ki sla, dulir bad ha kaba kut, na ka liang ki 2 ngut ki Myntri Rangbah ki la ong ba lada dei ka jaka ba shong ki briew ka Meghalaya, kan dei ka Meghalaya bad da ki shong ha Assam, kan dei jong ka Assam. Ngin hap ban don kata ka jing-ïa-ai bad jing-ïa-shim markylliang,” u la ong.
Shuh shuh u la bynrap, “Dei tang kane ka Sorkar kaba la shimkhia ban pynbeit ïa u pud u sam. Palat 50 snem la ïaid, ki Sorkar barim kim shym la shimkhia, ka long tang ka mat ilekshon ba ki kren halor u pud u sam.”
