Shillong, Naiwieng 10
U MP barim ka Rajya Sabha bad President barim ka NPP Megha-laya State Unit u Dr. Wanweiroy Kharlukhi u la ong ba u nongïalam ka Congress u Bah Vincent H. Pala un long kum u Myntri Rangbah ka Jylla lada ki paidbah na Jaiñtia kin pynjop ïa ka Cong-ress ha u snem 2028.
Haba kren ha ka jingïalap ilekshon ha Sutnga, East Jaiñtia Hills District kum ka jingkyrshan ïa u Bah Pala na ka bynta ka ilekshon shi-teng samoi ha Shillong Lok Sabha ka ban sa long shen, u Dr. Khar-lukhi u la ong ba ka Congress ka don ha lynti ban paw kum ka bor kaba donkam eh ha ka ilekshon sha ka Ïingdorbar Thawaiñ ban wan.
“Kynmaw ïa ki kyntien jong nga, ha u snem 2028, kan ym don kano-kano ka seng kaba lah ban thaw Sorkar khlem ka Congress”, la ong u Dr. Kharlukhi. “Na Rilum Garo, ka NPP ka ïoh 12 ngut ki MLA, ka Congress ka lah ban ïoh 13 haduh 14 ngut ki MLA, kamut lada na Rilum Jaiñtia kin ai ka jingkyrshan ïa u Bah Vincent Pala, khlem artatien ka jingjop kan long ïa ka Congress,” u la ong.
Haba ïanujor bad u snem 2018, u la ong ba ka jingjop jong ka NPP ha Lok Sabha ha katei ka por ka la plie lad ïa u Conrad K. Sangma ban long Myntri Rangbah ka Jylla.
“Ha ka por ba ka NPP ka la jop ha u snem 2018, u President ka NPP Sengkmie u Conrad K. Sangma u la long Myntri Rangbah ka Jylla”, u la ong. “Bad lada ka Congress kan jop ha u snem 2028, la khmih lynti ba u Bah Pala uba dei u President ka MPCC un long u Myntri Rangbah ka Jylla Meghalaya ban wan.”
U Dr. Kharlukhi u la kynthoh jur ruh ïa ki MLA ka Congress kiba la phet noh na ka seng, da kaba kynnoh ba kim sngewtynnad ïa ka jinglong nongïalam jong u Bah Pala hynrei ka kam barieh ïa ki ka long ka dei ka jingkwah bor.
U la kynthoh ba ki nongphet seng ki la kyntait ban kam ïa ka rekod jong u Bah Pala, da kaba kdew sha ka jingtreikam jong ka Congress ha ka ilekshon MP Lok Sabha 2024 watla ka NPP ka don ha ka bor synshar.
“Watla ka NPP ka don ha ka bor, hynrei ka la wan ha ka kyrdan kaba lai ha ka shuki dorbar jong ka Shillong”, la ong u Dr.Kharlukhi. “Ha Garo Hills, ka shuki kaba u P.A. Sangma bad ka ïing ka sem jong u, ki la bat ha kine ki 25 snem ba la dep, la knieh noh da ka Congress hapoh ka jingïalam jong u Bah Pala. Kim kwah ban kam ïa kane namar ba ki peit khmat ïa ka doh ha ka Sorkar.”
U la pynkynmaw ba ha u snem 2016, ha ka por ba u dang long u President ka NPP ha ka Jylla, u la ai jingmut ïa u Myntri Rangbah ka Jylla ban ïakhun ïa ka ilekshon Lok Sabha, da kaba kynthoh ba ka jingjop kan ïarap ïa ka NPP ban wan ha ka bor synshar ha Meghalaya ha u snem 2018.
“Ha u snem 2016, ha ka por ba nga dang long u President ka NPP Meghalaya Unit, nga la ong ïa u Conrad Sangma ba un ïakhun ia ka ilekshon MP, nga la ong ïa u ba lada u jop, ka NPP kan wan ha ka bor ha Meghalaya ha u snem 2018″, kumta da ka jingjop 20 ngut ki MLA na ki 24 tylli ki Constituency, bad u Conrad K. Sangma u la ïaid shakhmat ban long u Myntri Rangbah ka Jylla Meghalaya.”
“Don kiba ong ba nga la rah ïa ka mat tih dewïong tang hadien ba nga la sangeh ban long MP. Hynrei ngan kren shai, dei tang ma nga uba la nud ban kylli jingkylli ïa ka NGT kaba la pynjari ban khang tih dewïong haba baroh ki tip ba ka dei ka pliang ja jong ngi”, u la ong.
U la kylli ruh, lada ka jingtih dewïong la kynnoh ba ka pynjaboh ïa ka um bad pynïap ïa ki dohkha bad kiwei-kiwei ki jingthaw ba im ha um, te balei ba ki karkhana ha Delhi kim shym la khang haba ka jingjaboh jong ki ka la pynlong ïa ki khyllung ba dang kha da ki lak ngut ban ïap.
