Shillong, Naiwieng 10
Saw phew snem hadien ba ka la buh nyngkong ïa ka rukom riam jong ka nongbah Shillong ha ka map, ka Fashion Society Shillong ka la thmu ban pynlong ïa ka sien kaba 43 jong ka jingïakob Miss Shillong Super-model ha ka 21 tarik u Naiwieng 2026 ha U Soso Tham Auditorium Shillong.
Haba pynbna ha ka jingïalang ha ka sngi Ba-ar, u Chairman ka Fashion Society Shillong, u Bah Aldous Mawlong u la ong ba ïa kane ka jingïakob kaba la sdang ha u snem 1983 la seng da ka jingthmu ban kyntiew ïa ka jingitynnad bad jinglong kyrpang kaba dang ïai bteng ban long kawei na ki rynsan ba pawnam jong ka nongbah na ka bynta ki samla kynthei.
“La seng ha u snem 1983, ka Fashion Society Shillong ka pynlong ïa ka jingïakob ba donburom jong ka Miss Shillong Supermodel 2026,” ong u Bah Mawlong.
U la ïathuh ba ki don 14 ngut ki nongïashim bynta ban ïashimbynta ban ïoh ïa ka nam lahduh kaba la angnud bha ha ki lai tylli ki kyrdan, kata ka Traditional Fusion, ka Wings of Fantasy bad ka Little Red Dress, ha kaba kin ïoh ïa ka khusnam pisa kaba T.1 lak, T.75,000 bad T.50,000 kiba la tyrwa, ryngkat bad 6 tylli ki ‘sub-title’.
Ban pynsngewtynnad ïa ki nongïashimbynta, ka nongrwai jong ka Shillong ka Adorylene Sawian, kan pynhun ïa ki nongpeitkai, katba ka Kawei Ka Sur Ensemble kaba la pawnam mynta kan pynkhih ïa ki paidbah da ki jingrwai jong ki.
Kane ka jingpyni dur kan pyni ruh ïa ki jingthaw ba tynrai bad kiba kyrpang ba la shna da ka tnad shna dur jong ka skulbah William Carey, kaba pyndap ïa ka jingshna ba thymmai ha kane ka janmiet.
