Shillong, Naiwieng 10
Ka Joint Action Committee (JAC) Against Shillong Ropeway Pro-ject, ka la ïoh pdiang ïa ka shithi na u Bah Sanbor Shullai, MLA ka South Shillong Konsti-twensi, ba u la khot ban ïakren lashai ka sngi Balang ha ka por 4 baje ha State Convention Centre.
Kane ka shithi ba wan lyngba u MLA, ka JAC ka la ïohpdiang hynnin ka miet.
Ka jingkhot u Bah Sanbor ïa ka JAC, ka dei halor ka jingïakhih shongkyllaiñ jong ki, ban dawa na ka Sorkar ban weng noh ïa ka projek Ropeway ha Lum Shyllong bad rah shawei pat.
Hadien ba la ïoh pdiang ïa kane ka shithi na u MLA, na ka liang ki nongïalam ka JAC ki la pynpaw ka jingsngew lyngngoh da kaba ong “La san sngi ka jingshong ïakhih bad da ki spah kynta, u Bah Sanbor u jah shaei khlem wan mih bad u khot ïakren kylla mynta”.
Haba kren sha ki lad pathai khubor ha ka 10 tarik u Naiwieng 2026, ki nongïalam ka JAC ki la ong ba kin pdiang ïa kane ka shithi ba khot u Bah Sanbor ban ïakynduh lashai ban ïakren halor kane ka mat, da kaba kren shai “Lada kam pynhun katkum ka jingdawa jong ki, kin bteng beit ïa ka jingïakhih” kata ka long ban wengnoh mardor ïa katei ka projek.
“Haba u Bah Sanbor u khot ha kane ka jingïalang kynthup ïa ka Seng Khasi Ri Raid Laban Shillong, balei pat um khot lang ïa baroh ki niam kiba don Laban, ba kin ïoh ban pynpaw halor katei ka mat? ki la buh jingkylli.
“Ngin wan ha katei ka jingïakynduh ba phi khot, bad ngin sa pynshai ïa kaei ba ka JAC ka don ban dawa halor ka projek,” ki la ong.
Ki la krenshai ruh ba kim kwah ïa ka Ropeway hynrei ki kwah ïa ka um.
“Ka jingïakren jong ngi lashai lada jia ba kam seisoh, ngin ïa wan biang ha kane ka jaka ban bteng beit ïa ka jingïakhih da ki taïew ki bnai, kat bym pat ai ka jubab kaba shai kaba pynhun ïa ka jingdawa jong ngi,” la bynrap ki nongïalam ka JAC.
Kumta ka JAC ka la khot ïa baroh ki paidbah kiba don ka jingkitkhlieh na ka bynta ka projek Ropeway, ba kin sngewbha ban wan lashai ka sngi ha ka por 4 baje ha State Convention Centre.
