Shillong, Naiwieng 10
Kumba 3 kynta tam eiei, ki bor pynlip ding ki la ïakhun ban tem ïa ka jingklang ka ding ha kawei ka kudam buh tiar ‘Tent House’ bad ïa katto-katne ki bynta jong kawei ka jingtei (building), kaba marjan kaba dei jong u Bah Rajesh Syiem, kaba don ha Demseiñïong, Shillong.
Kane ka jingbam duh ka ding kaba shyrkhei bha, ka la jia ha ka por kumba 2:00 haduh 2:30 baje nohphai sngi jong ka 10 tarik u Naiwieng 2026.
Kane ka kudam kadei kaba la buh ïa ki tiar pynriam jingkhawai bapher-bapher, kiba kynthup ïa ki plywood, ki shuki, ki tarpar, ki siej bad kiwei-kiwei ki tiar pynitynnad, bad baroh kine ki jingdon jingem ki la ingkhong khait ha katei ka ding.
Mar shu ïoh jingtip shaphang kane ka jingjia, ki kali pynlip ding (Fire Tenders), ki la mareh sted sha katei ka jaka ban tem ïa ka ding na ka bynta ban khanglad ba kan nym pur sha kiwei pat ki ïing ki sem kiba don marjan.
Haba kren bad u trai kane ka kudam, u Bah Rajesh Syiem u la ïathuh ba ka jingkem ding ka la long kynsan kynsan, ha kaba ym shym la lah shuh ban tem ïa ka bad ka la pynjulor lut kat ba don ha kane ka jaka.
Ki kali pynlip ding ki la poi ha kane ka jaka naduh ka 3 baje, hynrei namar ba ka dang dei ka por kaba wai skul kumta ka la buh jingeh khyndiat ban poi kloi ki kali pynlip ding hynrei watla katta ruh, ki la ïakhun bha ban tem ïa ka jingklang ka ding.
“Ka jinglut na kane ka jingjia ka lah ban poi sha ka 2 klur eiei, hynrei ngi ainguh ïa U Blei ba ym shym la don kano-kano ka jingjia ba sngewsih ha kane ka jingjia, ka don ruh ka ïing ba sah ki nongshongwai ha kane ka jaka kaba dei ka jingtei ba 4 mala, ha kaba mar shu tip ïa ka jingkem ding, la ïoh ban phah mih noh ïa ki bad kam shym la don kano-kano ka jingjia ba sngewsih, u la bynrap.
