Mairang, Naiwieng 10
Ki bor pynïaid District jong ka Eastern West Khasi Hills District ha ka sngi Ba-ar ki la pynlong ïa ka jingrakhe ïa ka jingdap 5 snem jong ka jingïoh ïa ka District naduh ba la pynkha ïa ka ha ka 10 tarik Naiwieng, 2021.
Ha kane ka sngi la ïadon lang u Symbud Myntri Rangbah ka Jylla Bah Sniawbhalang Dhar kum u kongsan, Bah Metbah Lyngdoh MLA ka thaiñ, Kong Anita Kharpor, IAS, Deputy Commissioner, Bah Equator Nongrang MDC, Paiem PM Syiemlieh, Syiem ka Hima Nongkhlaw, Bah GW Lyngdoh MPS, Superintendent of Police, Bah M. Diengdoh ADC, Bah L. Myrthong AC, ki ophisar na ki tnad Sorkar bapher bapher, ki khynnah skul, samla pule college, ki SHG bad ki paidbah nongshong shnong.
U Bah Sniawbhalang Dhar haba kren kum u kongsan u la pynpaw ïa jingkmen ban ïadonlang ha kane ka jingrakhe bad u la ong, ka jingïoh ïa ka District ka long ban pynjan ïa ka Sorkar sha u paidbah, ban pynsuk ïa jingdonkam jong u paidbah.
U la ong ba watla ka dei ka District kaba dang thymmai, hynrei ka dei pat kaba la paw ha ka history jong ka Jylla, ha kaba nangne la mih ki riewkhraw, ki riewshlur, ki khlawait ka Jylla kum u Tirot Sing Syiem, kane ka District ka paw ha ka jingdon ki riewdonsap ha ki bynta bapher-bapher.
U la ong ruh ba ka jingmih jong ki riewdonsap, la ka long ha ka rwai ka siaw, ka put ka tem, ki kam ïalehkai bad kiwei ka dei ka jingkyrmen ïa ka District ba kan kiew shaphrang.
U Bah Sniawbhalang u la ong, ka Sorkar ka la shim ïa ki lad ki lynti ban kyntiew ïa ki skul, ka koit ka khiah, ki surok bad kumba 35 tylli ki social welfare scheme kiba ka Sorkar ka la wanrah na ka bynta ban kyntiew ïa ka ïoh ka kot jong ki nongshong shnong ha ka Jylla, kumta u la ong ïa ki khun samla ba ka lad ka don na ka bynta ba kin seng kam lajong ban ïeng ha la ki jong ki kjat lyngba ki skhim bapher-bapher, ym dei ban shu shaniah tang ha ki kam Sorkar hynrei ban shim ki lad ki lynti ba la ai da ka Sorkar.
U la ai khublei ruh ïa ki bor pynïaid District, ki ophisar kiba la trei shitom ban kyntiew ïa ka District lyngba ki kam pynroi.
U Bah Metbah Lyngdoh haba ai jingkren u la ong, ka jingïoh District ka ïarap ban pynjan ïa u paidbah sha ka Sorkar lyngba ki kam pynroi bapher-bapher.
U ïawer ïa ki paidbah khamtam ki khun samla, ba ki dei ban long ka nuksa ïa kiwei, ban pynlong ïa ka district kaba khuid ba suba, ka District kaba im suk kaba lait na kano-kano ka jingkulmar bad ka District ka ban kiew shuh shaphrang ha ka liang ki kam pynroi.
Ïa kane ka sngi la pynphuh pynphieng da ki jingrwai bad jingshad ba la shim bynta da ki khynnah skul bad samla pule college, ka jingïatan tyllai, mawpoint bad kiwei. La pynkhreh ruh ïa ki stall ha kaba la buh ïa ki tiar kiba la shna bad pynmih da ki SHG napoh ka district.
Ha kane ka sngi la ïoh ruh ban pynkup burom ïa ki khynnah kiba pass bha ha ka SSLC bad HSSLC, la ïoh ruh ban sam ïa ki ‘tool kits’ na ka bynta samla kiba la pyndep ïa ki skill training bapher-bapher lyngba ka MSRSS bad ruh ka jingsam ïa ki cheque sha ki nongïoh jingmyntoi lyngba ki scheme, ki nongïalehkai sport kiba la wanrah burom ïa ka District lyngba ki medal, bad la ai ruh ïa ki khusnam sha ki san tylli ki PHC jong ka District bad sha ki VEC.
