Shillong, Jylliew 05:
U Myntri ka Sorkar Jylla bad nongïalam ka United Democratic Party (UDP), Bah Paul Lyngdoh, u la buh jingkylli halor ka jingmih mynta jong ka Voice of the People Party (VPP) hapoh ka jingïalam u Bah Ardent Miller Basaïawmoit ban ïakhih halor ka State Reservation Policy.
Haba kynnoh ba ka lah ban don ka jingïadei hapdeng u Dr Mukul, Myntri Rangbah barim bad ka VPP, u Bah Paul u la buh jingkylli ïa u Bah Ardent ba balei u la wanrah ïa kane ka mat mynta, kata hadien 3 bnai ba la thaw ïa ka Sorkar MDA-2. “Balei u la sngap jar halor kane ka mat ha ki 8 tylli ki snem, kata ha ka por ba ïa ka jylla la synshar da u Dr Mukul Sangma? Balei mynta pat? U la buh jingkylli.
“Ka jingthmu ne ka thong ka jong nga ka long ba haba la jied ïa nga kum u nongmihkhmat, ngan pyndep ïa ka kamram hapoh ka cabinet, nga la ïoh ban ïakren hapoh ka cabinet, ïa kaba ngam lah satia ban ïathuh sha phi namar ha ka sngi ba nga shimti kum u Myntri, nga la dep bam smai,” la ong u Bah Paul.
“Ngam sngewthuh balei pat donkam ban lum ban lang bad pynkhih win ïa u paidbah ha kane ka rukom tang hadien 3 bnai ba la thaw ïa ka sorkar,” u la ong.
Haba kynthoh halor ki jingshah kynthoh jong u ha ki katto katne ki kynhun halor ka jingsngap jar ïa ka mat bhah thung kam thung jam, u Bah Paul u la ong, “Ka long kaba suk ban pyrta bad hylla, hynrei kaba eh pat ban leh ne trei. Sha baroh kito kiba kren da ki nia ba heh ba heh, nga kwah ban kylli ïa ki, kaei kaba phi la leh na ka bynta ka jaidbynriew?
U Bah Paul u la ong, ka jingbym shym la wan ban ïadon lang ha ka jingshong shah thngan ka VPP, hato ka long kaba dei mo ïa u Myntri Sorkar ba la pynthikna ban ïakynduh bad ki Myntri kawei pat ka ri, ban pyndam noh ka jingïakynduh namar ka jingshong shah thngan kawei ka seng saiñ hima.
“Nga la ïohi ki video ba pynkynmaw ïa ka jingkren jong nga ha u snem 2002 halor ka mat Reservation Policy. Nga ai khublei ba dang pynneh ïa ka video,” u la ong bad bynrap ba 20 snem mynshwa ruh la ïoh ban kren paidbah halor kane ka mat.
“20 snem mynshwa, phi dei ban kylli kylla pat hangno don ki ‘video’ jong ka jingkren u Bah Ardent, namar ha kato ka por, u la long u nongïalam seng. Wat la um shym la wan ban ïadon lang ha ka jingshong shah thngan ka jong ngi ba la pynlong ha kato ka por, ngi khlem thnum ne beiñ, “balei u khlem wan shah thngan lang”. Um shym la wan, namar haba kren ïa ka Reservation Policy, kan shitom ban kren ïa u kum u President ka Federation of Khasi Jaiñtia and Garo People, un kren kumno bad kumta namar ba ngim kwah ba un don ha ka jingeh, ngi khlem khot,” la ong u Bah Paul.
