Shillong, Jylliew 05:
U Myntri ka tnat ki Kam Jngohkai Pyrthei ka jylla, Bah Paul Lyngdoh, u la pyntip ba ka Sorkar Jylla ka la rai ban pyntreikam ïa ka Shillong Ropeway Project katkum ka ‘European Standard’ ne ka rukom pyntreikam ha dewbah Europe, ka ban dei ka ‘world class’ teknoloji.
Haba kren sha ki lad pathai khubor ha ka sngi Nyngkong, u Bah Paul u la pyntip ba u la ïakynduh ïa u Myntri bad ki heh ophisar ka Switzerland ban ïakren bad ïasyllok ïa kane ka kam ha ka jingleit ïuhkjat ba dang shen sha kane ka Ri.
“Ka jingthmu jong ka jingleit jong ngi sha Switzerland ka long ban pynkloi ïa ka jingtreikam jong ka Shillong Ropeway Project; kaba dei ka project kaba la kot sha ka T.140 klur eiei ba bei tyngka da ka Asian Development Bank,” la ong u Bah Paul.
Haba pynpaw ba ka Shillong Ropeway Project kan dei kawei na ki project Ropeway ba heh duh ha ka thaiñ shatei lam-mihngi ka Ri, u Bah Paul u la ong “Ngi khmih lynti ba ka jingwan kai jong ki nongshang suwari kan nang bun sha Jylla bad ka kam jngohkai kan dei kawei na ki lad ai kam ba heh duh ïa ki paid nongshong shnong ka Jylla”.
Katkum ka jingong jong u, ha Sohra ki trai ïing kiba ju kamai T.3000 shibnai kum ka bai wai, ki la kamai mynta haduh T.3000 shisngi na kawei ka kamra.
“Ka jingleit jong ngi sha Switzerland ka dei hadien ka jingshah khot sngewbha ha ka Sorkar Switzerland. Ngi la ïakynduh ïa u Myntri bad ki ophisar ba la rangbah ka Switzerland bad ka jingthmu hi ka dei ba ngi kwah ban pyntreikam ïa ka project katkum ka European Standard,” la ong u Myntri.
Haba kynthoh ïa ki jingkynnoh ba u la kiar ban kren eiei halor ka Reservation Policy, u Bah Paul u la ong, “Ngam lah ban shu pynsangeh noh ïa kine ki jingïalang tang halor ka nongrim ba ki don ki briew kiba shong shah jingthngan ha Shillong bad ba nga hap ban wan mareh bad pynsangeh noh ïa kine ki jingïalang kiba la ai jingbit da ka Ministry of External Affair”.
Haba pyntip ba ka Shillong Ropeway Project kan sdang ha u bnai Nailar mynta u snem, u Myntri u la ong, “Ngin sa sdang noh ïa ka jingkhot ‘tender’ bad kyrmen ba shuwa u Nohprah, ngin sa lah ban pyntrei ïa ka kam bad kan shimpor ïa ngi kumba ar snem ban pyndep ïa ka”.
