Shillong, Jylliew 05:
Ka Voice of the People Party (VPP) ha ka Lah Sngi U Blei ka la pynshai ba ka nongrim ba ka ïeng halor ka bhah kam bhah jam (Reservation Policy) kam dei kaba long pyrshah ïa kano-kano ka jaitbynriew.
Ha u kyrwoh khubor, u nongaiktien ka VPP, u Dr Batskhem Myrboh, u la ong ba ka nongrim jong ka seng ka long ka bym shah liang bad kaba ailad ïa baroh bad kam don satia kata ka jingleh pyrshah jaitbynriew. U la ong ba ka VPP ka dei ka seng jong baroh kiba shong ba sah ha Meghalaya ha kaba ka thong ka long ban pynïoh ïa ka hok jong ki trai ri trai muluk.
U la ong ba ka VPP ka sngewkhia ba ka Job Reservation Policy jong u snem 1972 ka la wanrah ïa ka jingkhia jingmut ha ki Khasi bad Garo. U Dr Myrboh u la ong ruh ba ka jingpyntreikam ïa ka Roster System khlem da peit bniah shwa ïa ka Reservation Policy kan wanrah ïa ka jingbym ïa biang ha ka liang ka ïoh kam ïoh jam ha ki shnat treikam ka sorkar.
Ha ka jingshisha, u la ong ba ïa katei ka Policy la dei ban peit bniah naduh kham mynshwa khnang ba kan ym don ka jingshah liang ïano-ïano la ki dei na kano-kano ka jaitbynriew Khasi lane Garo.
“Kaba sngewsih ka long pat ba ki seng saiñpyrthei tang ban ïoh myntoi ïalade ki la kyntait ban shim ïa ka jingkitkhlieh ban pynthymmai ïa katei ka Policy. Namarkata, ka jingïakhih jong ka VPP ban pynkylla ïa kane ka Policy kam dei ban ai jingmyntoi tang ïa kawei ka jaitbynriew, hynrei ban pynthikna ba kan ym don ka jingshah leh shiliang,” la ong u Dr Myrboh.
U la kdew ba ki Khasi bad ki Garo ki la ïatreilang ha ka jingïakhih ban ïoh ïa ka jylla lajong da kaba pyrshah ïa ka jingleh hangamei ka Assam. Namarkata, ka la kyntu ba dei ban bteng ïa ka mynsiem jong ka jinglong shipara haduh ki sngi bad ki por ban wan.
Shuh shuh u la ong ba ka VPP ka sngewthuh bad sngewkhia halor ka jingbym biang ka roi ka kiew khamtam ha ka liang ka pule ka puthi. U la ong ba ka ‘Result’ ba la pyllait dang shen da ka Meghalaya Board of School Education ka la pyni shai ïa ka jingbym biang satia ka pule ka dangle ha Rilum Garo. U Dr Myrboh u la ong ba ka long kaba sngewsih ba ki sorkar barim bad ba mynta ki la pulom ban kyntiew ïa ka pule ka dangle khamtam ha Rilum Garo.
Nalorkata, u la ong ba ki nongshong shnong ka Meghalaya ki la kylla long ki ‘langkñia ha kti jong ki ‘riew saiñpyrthei kiba bamsap bamngem. Ki ’riew saiñpyrthei na ki seng bapher-bapher ki hap ban shim ïa ka jingkitkhlieh halor ka jingduna ka roi ka kiew ha ka jylla, u la ong.
“Kaba sngewsih ka long ba ïa ka dor jong ka jingbamsap bamngem la hap ban siew da ki duk ki suk jong ka jylla watla ki dei na kano kano ka jaitbynriew ruh. Ka jylla ka la sakhi ïa ka jingdon jong ki ‘riew saiñpyrthei kiba riewspah haduh katta katta, hynrei ka jylla pat ka duk bad ki briew baduk ruh ki jyllei,” la ong u Dr Myrboh.
U la ong ba ka VPP, ïa kaba la seng ha u snem 2021, ka don ïa ka thong ban wanrah ïa ka synshar khadar kaba khlaiñ bad kaba bha khnang ban ai ïa ka lawei kaba kham bha sha ki nongshong shnong.
Namarkata, ka VPP ka la khot la wer ïa ki nongshong shnong ka Rilum Garo ban ïatreilang bad ka seng ha ka jingpyrshang ban wanrah jingkylla ha ka saiñpyrthei ha jylla ha kaba ki nongïalam kin long kiba don jingkitkhlieh bad kiba ai jingkheiñ sha ki paidbah halor ki kam ba ki leh.
