Mawkyrwat, Naiwieng 11
Ka Hynñiewtrep National Youth Front (HNYF) South West Khasi Hills District hapoh ka jingïalam u Bah Shainingstar Wanniang, President ryngkat ki dkhot hadien ka jingud jingnam ki paidbah ha kine ki sngi ki la hiar jurip ïa ka skul Pynden Lyngdoh Presbyterian Deficit Lower Primary kaba don ha ka shnong Pynden Lyngdoh, South West Khasi Hills District.
Ïa ka skul Pynden Lyngdoh Presbyterian Lower Primary kaba dei ka Deficit skul la seng ïa ka naduh u snem 1956.
Ha kane ka jingjurip, ka seng ka la lap shibun ki jingduna hapoh kane skul naduh ki nonghikai, ki kamra klas bad ka jingduna ki nongtrei hapoh ka Mid-day Meal.
La ïoh ban ïakren ruh bad ka nonghikai jong kane ka skul kaba la ïathuh ïa ki jingeh jong ka ban hikai marwei ïa ki khynnah kiba don kumba 175 ngut hapoh kane ka skul. Ka la ïathuh ruh ba hadien ka jingkhlad noh jong uwei u nonghikai la kumba lai snem duna ka la hap ban hikai marwei bad kane ka la wanrah jingeh shibun ïa ka ban pyndep lut ïa baroh ki kam naduh ki kam hikai ïa ki khynnah, ka jingleh online bad kiwei ki jingdonkam.
Na ka liang ka seng hadien ka jingjurip ka la kyrpad ïa ka Sorkar ba kam dei ban leh meinah ïa ki skul nongkyndong namar bunsien ki riew shemphang ki riew khraw ki mih na ki skul nongkyndong.
Ka seng ka la kyntu ruh ïa ka Sorkar ba ka dei ban thung noh kloi ïa ka post nonghikai hapoh kane ka skul, kaba ar ban shna shuh shuh ïa ki kamra klas hapoh ka skul namar kumba long mynta ki don tang artyll ki kamra bad la hap ban pynshong lang hajuh ka kamra ïa ki khynnah kiba pule ha la ki jong ki kyrdan bad kaba lai ban thung nongtrei biang hapoh ka Mid-Day Meal namar kumba long mynta ki don tang arngut ki nongtrei.
