Shillong, Naiwieng 11
Ka jingïalang ba la khot da u Myntri Sorkar bad u MLA ka South Shillong Constituency u Bah Sanbor Shullai ban ïakren pynbeit haba ïadei ka mat Shillong Ropeway Project ka khlem ai jinghun satia ïa ka JAC Against Shillong Ropeway Project.
Ïa kane ka jingïalang la khot pynlong ha ka por janmiet jong ka sngi Balang ha State Convention Centre, Shillong hapdeng ki 26 tylli ki kynhun ba kynthup ïa ki seng bapher-bapher kiba don hapoh ka Riat Laban Dorbar Pyllun.
La kynnoh ba haba ka jingïalang ka la ïaid katto katne por ka la don ka jingïapyni nia hapdeng ki dkhot jong ka JAC bad ki bor ba pynïaid ïa ka jingïalang ha kaba la mih ruh ka thma ktien kaba jur kaba la pynlong ruh ïa u MLA ka Laban ban mih syndet noh na katei ka jingïalang.
Ki nongïalam JAC ki la ïaleh ban khang lynti ïa u Bah Sanbor haba u la thmu ban mih na katei ka jingïalang ha kaba ka la mih ka jinghylla ba jur na ki longkmie ban dawa ban pynkynriah ïa ka projek Ropeway sha kiwei ki jaka bad pynrem jur ïa kane ka rukom leh jong u MLA, ha kajuh ka por ki la pynpaw ba kane ka jingleh ka la pynbitar bun shah ïa ki paidbah kiba la pynlait por ban wan sha kane ka jingïalang.
U Bah Sanbor ha ka jingpahara ki pulit jong u, ula mih beit-beit na ka jingïalang bad phet bak na katei ka jaka ba ïalum ki paidbah bad ki dkhot jong ka JAC.
Haba kren sha ki lad pathai khubor, ki longkmie jong ka JAC ki la kynnoh ba ha ka jingïalang u MLA jong ki u la shu pynsngew ïa kaei ba ka Sorkar ka thmu ban kren bad ailad tang arngut ki longkmie ban kren ha kane ka jingïalang, hadien kane u Bah Sanbor u la pynkut ïa ka jingïalang bad mih noh na katei ka jaka.
Ka JAC ka la pynrem jur ïa ka jingleh jong u Bah Sanbor bad ki briew pahara jong u, ïa kaba ki la kynnoh ruh ba ka la don ka jingshah thombor ïa u Bah H.B. Nonglang, nongïalam jong ka Green Tech Foundation (GTF) hadien ba la pynwai ka jingïalang.
Shuh-shuh ka JAC ka la pynpaw ba kam lah ban pdiang ïa u Bah Sanbor kum u nongmihkhmat jong ka South Shillong, da kaba kynnoh ba u la wanrah lang ïa ki briew ha ka jingïalang kiba long kum ki Gunda. Ki longkmie ki la kdew ruh ba ka jingkren jong u Bah Sanbor, u long u kpa trai jong ka shnong Laban baroh kawei, “hato u kpa un leh kumne ïa la ki khun? Ki la buh jingkylli.
Ki la pynpaw ba ki wan sha kane ka jingïalang da ka jingkyrmen ba kan long ka lad ban ïakren halor ka jingdawa, pynban ki la hap ban mih da ka jingbitar bad ka jingsngewdiaw ba ka jingïalang kam long kaba ai jinghun bad kaba seisoh ïa ki mat kiba ki la dawa.
