Shillong, Naiwieng 11
Ki nongshong die madan kiba shong ha ki lynti ïaid kjat ha GS Road bad Motphran haduh mynta kim pat tip ïa ka jaka kaba ki dei ban leit shong ban die jingdie wat hadien ba ka Sorkar ka la bthah ïa ki ba ki dei ban kynriah noh hashwa ka 25 tarik u Nai-wieng 2026 na ka jaka ba ki shong mynta.
Haba ïakren bad ki nongshong die dukan madan na GS Road bad Motphran ha ka 11 tarik Naiwieng 2026, ki la ïathuh ba haduh mynta kim pat tip shaei ki hap ban leit lada ka Sorkar kam shah shuh ïa ki ban shong ha madan ïaid kjat. Ki la ïathuh ba ka Sorkar ka la hukum ba kin nym dei shuh ban shong pynphriang ban sei ïa ki tiar ki tar jong ki ha ki jaka ba la mana hashwa ka 25 tarik Naiwieng 2026 bad ki dei ban leit shong noh sha ki jaka ka ba la pynkhreh da ka Sorkar.
Ki nongshong die madan ki la ong ba kin nym kynriah bad kin shong beit ha kajuh ka jaka bad kin sa peit kaei ka ban jia namar lada ki hap ban leit shawei kim lah shuh ban die jingdie kumba ka long mynta.
Shuh shuh ki la ïathuh ruh ba ki dang bun na GS Road bad Motphran kim pat don ïa ka COV namar kim pat ïoh ka jaka kaba biang bad lada ka Sorkar ka ai ka jaka kaba biang ïa ki, ki hap ban leit shim ïa ka COV.
Katkum ka jingïathuh ki nongshong die madan ki ïathuh ba na ka liang jong ki kim hun bad kim kwah ban leit shong sha ki mala parking ha ïew Mawlong hynrei ki kwah kum sha Lum Survey ka jaka kaba biang na bynta baroh kiba die madan.
Kawei ka longkmie ba shong ha Motphran ka la pyneh triang ba kan nym khih na Motphran wat lada la mih ka hukum ban kynriah, ka la ong ba kan nym khih na kajuh ka jaka.
Na ka liang ki longkmie ba die jaiñ ha GS Road ki la pynsngew bad kyrpad sha ka Sorkar ba kadei ban ailad shwa ïa ki ba kin shong shwa ha kajuh ka jaka ba kin ïoh die jingdie ha ka ïew Khristmas namar ka Khristmas ruh kam slem shuh namar baroh shi katta ha kine ki sngi ka ïew ka hat ka duna bha.
Kawei ka longkmie ba die kwai dong da kiba bun snem ha Motphran ka la pynpaw ïa ka jingbym sngew ïahap lada ka Sorkar kan leit phah shong ïa ki sha kyndong bad kam sngew ïahap halor kane.
Ka la ong ruh ba lada ka Sorkar kan ai jaka sha Lum Survey bad them Metor baroh ki nongshong die madan kin rung lut hynrei ka Sorkar ïa ki jingsniew ha kitei ki jaka kam lah ban kyndang, kumta ka la ong, ka Sorkar ka rat dyngkhong ïa kaba bha bad pynroi ïa kaba sniew.
“Lada shna ïew ha Lum Survey katno kan bha bad shna da kaba heh la rung lut baroh-baroh tangba ïa ka Lum Survey la pynroi da ki kam jaboh kiba pynsma iwtung ïa katei ka jaka, katba ïa ngi ki bym leh eiei ba kamai da ka hok ki wit, ” ka la ong.
Ka jingbthah na ki bor jong ka Sorkar lyngba ki kor jingpynsawa lane ki tynghung ka la jan man ka sngi sha GS Road bad Khyndailad ban bthah lane hukum ïa ki nongshong die madan baroh ba kim dei shuh ban sei ïa ki tiar jong ki ha ki jaka ba la pynbna kum ka No Vendor Zone hashwa ka 25 tarik Naiwieng 2026, bad kino-kino kiba pynkheiñ ïa ka aiñ kin shah weng bad kin shah pynshitom katkum ka aiñ jong ka Meghalaya Street Vendor Protection of Livelihood and Regulation of Street Vending Scheme 2023.
