Shillong, Naiwieng 11
Shiphew sngi, shi-phew tylli ki nongbah, shiphew tylli ki prokram pynbyrngia paidbah. Uwei u khlur ka Electronic Dance Music (EDM). Ha ka jingrakhe ‘Holi’ 2027, ka ‘Sunburn Arena’ kan wan ïalam biang sa shisien ïa u Martin Garrix sha India na ka bynta ka jingïaid lynti kaba 10 sngi ha u bnai Lber 2027, ka ban pynkylla ruh ïa kane ka tamasa jong ki rong ki rup sha ka jingrakhe kyrpang ïa ka put ka tem ha ka ri baroh kawei.
Da kaba sdang ha nongbah Ahmedabad ha ka 10 tarik u Lber, kane ka jingïaid lynti kan phaikhmat sha Bhubaneswar ha ka 12 tarik u Lber, Chennai ha ka 13 tarik, Bengaluru 14 tarik, Shillong 16 tarik, Kolkata 17 tarik, Hyderabad 19 tarik, Delhi NCR 20 tarik, Mumbai 21 tarik, hashuwa ban pynkut ha nongbah Pune ha ka 22 tarik u Lber, 2027.
Ki nongkyrshan kiba thrang ban long shi bynta jong kane ka jingrakhe kyrpang, ki lah ban pynrung kyrteng kham kloi ïalade naduh ka 4 tarik u Naiwieng 2026, ha ka por 5 baje janmiet ha ka ‘Martin Garrix Page’. Ka ‘Registered User Pre-Sale’ kan sdang ha ka 16 tarik Naiwieng 2026 ha ka por 12 baje mynsngi, ka ban bud pat sa tang na ka bynta ki ‘RuPay Cardholder Pre-Sale’ ha ka por 12 baje mynsngi ha ka 17 tarik Naiwieng 2026.
Ka ‘General On-Sale’ na ka bynta kane ka jingïaid lynti kan plie ha ka por 12 baje mynsngi ha ka 18 tarik Naiwieng, 2026, tang ha ka rynsan ‘BookMyShow’, kaba dei ka rynsan pynbyrngia kaba pawnam tam jong ka ri India.
Na ka bynta ki nongkyrshan EDM ka ri India kiba la san sted bha bad ka kyrteng u Martin Garrix bad kiba la san ryngkat ki sur ‘Animals’, ‘In the Name of Love’, ‘Scared to Be Lonely’ bad ‘High on Life’, kane ka dei ka lad ban shem markhmat bad u Garrix.
U Martin Garrix u la ong, “Ka ri India ka dei ka bynta kaba kongsan eh jong ka jingïaid lynti jong nga, bad ka jingieid bad jingkyrshan kaba nga la ïoh pdiang na katei ka ri ha kine ki snem kiba la dep ka long kaba khraw shisha. Nga la ju wan sha India la palat 10 snem mynta bad nga la leh bun tylli ki ‘show’ kiba ngam lah shuh ban klet ha katei ka ri. Ban wanphai biang na ka bynta ka jingïaid lynti sha ki 10 tylli ki nongbah bad ban rakhe ïa ka tamasa ‘Holi’ ryngkat bad kumba 2 lak ngut ki briew ka kyntiew ïa kane sha kawei pat ka bynta kaba thymmai!! ”
U Karan Singh, u CEO ka Sunburn, u la ong, “U Martin Garrix bad ka rynsan EDM ha India ki don ïa ka jingïaid lynti kaba la nang khie nang san katba nang ïaid ka por, ha kaba ka nang kyntiew shuh-shuh ïa ka kyrdan man ba u wan sha India. Katto-katne ki prokram kiba sah kynmaw tam jong ka ‘Sunburn Arena’ ki dei bad u Garrix, bad kane ka jingïadei jong ki ka kham palat ban ïa ka put ka tem. Da kaba wan ïalam biang ïa u na ka bynta ka jingïaid lynti sha ki 10 tylli ki nongbah ha ka tamasa ‘Holi’, nga sngew ba ka dei ka lynti kaba biang tam ban pynïaid shakhmat ïa kane ka jingïaid lynti.”
