Shillong, Naiwieng 11
U Myntri Rangbah ka Jylla, u Conrad K. Sangma ha ka Sngi Balang u la plie ïa ka jingrakhe Jubili Ksiar jong ka Tamasa 100 Ksing Wangala ha Wangala A’dam, Chibragre, Tura, da kaba pynbna ba ka jingangnud jong u (L) P.A. Sangma ban rakhe ha ryngkat 1,000 tylli ki ksing ha kaba khatduh ka la urlong.
“Kane ka sngi ka ai ka jingsngewhun kaba khraw ïa nga ban pynseisoh ïa ka jingangnud jong u (L) P.A. Sangma da kaba rakhe ïa ka Jubili Ksiar ha ryngkat 1000 tylli ki ksing,” ong u Conrad, haba ki 1000 ngut ki nongtem ksing bad 3000 ngut ki nongshad ki la plie sdang ïa kane ka tamasa ba saw sngi halor ka phang, “Rhythm of 1,000 Drums.”
U Myntri Rangbah u la ong ba u sngewkmen ban ïashim bynta ha ka tamasa kaba heh tam jong ki A’chik bad ban sakhi ïa ka kylla kaba 50 jong ka.
U la kynmaw burom ïa ki nongprat lynti kiba la sdang ïa kane ka tamasa ha u snem 1976, (L) Captain A. Sangma, (L) Sanford K. Marak, (L) Dr. Bernard K. Marak, (L) Probin Raksam, (L) Hubert K. Sangma, (L) Liander K. Mara, (L) Herik S. Sangma, (L) Felix R. Sangma bad (L) Garnet Mangsang.
“Ngi dei ban kynmaw burom ïa ki ha kane ka sngi kaba kyrpang bad ai khublei ïa ki bad watla kim don shuh bad ngi, ka Sorkar ka kwah ban pynkup burom ïa kine kiba la khlad noh ha kane ka sngi kaba kongsan,” u la ong.
U la ai khublei ruh ïa A’king Nokma jong ka thaiñ ba la ai sngewbha ïa ka jaka ban pynlong ïa kane ka tamasa.
U Conrad u la ong ba ka Meghalaya ka nang roi nang par bad kiew shaphrang, hynrei ka long kaba donkam ban pynneh-pynsah ïa ka snap kyrpang, ka kolshor bad ki tynrai wat hapdeng ka jingtyllun jong ka roi ka par.
U la ong ruh ba bun ki ri kiba la kiew ha ka roi ka par ki mad ïa ki jingïakynad bad kim don jingsuk namarba ki klet noh ïa la ka jinglong kyrpang jong ki, bad u la pyntikna ïa ka jingkyrshan jong ka Sorkar ban pynneh-pynsah bad kyntiew ïa ka jinglong kyrpang, ka kolshor bad ka riti-dustur jong ka Jylla.
“Kane ka dei ka jinglong kyrpang jong ngi bad ngi dei ban pynneh-pynsah, kyrshan, ïarap bad sngew sarong ïa ka”, u la ong.
U la pyntip ba ka Sorkar ka la bei tyngka haduh T.20 klur lyngba ka tnad PWD na ka bynta ban pynbha ïa ka Wangala A’dam, bad sa T.6 klur ban pynlong ïa kane ka tamasa mynta u snem.
U la ong ba ka jingpyrshang ban ïoh rung ha ka ‘Guinness World Records’ ka donkam ïa ka jinglut kaba bun, hynrei ka Sorkar ka la mang ïa kane da kaba pynshong nongrim ïa ka jinglong kongsan bad jingkhraw jong ka.
Ha kane ka jingïalang plie paidbah la wan ban ïashim bynta lang ruh da ka Mehtab Chandee A. Sangma, MLA ka Gambegre, Arbinstone B. Marak, MLA ka Selsella, Jimmy D. Sangma, MLA ka Tikrikilla, Sanjay A. Sangma, MLA ka Mahendraganj, CEM, GHADC, u Dormonath Sangma, ki MDC ka GHADC, ki nongïalam niam bad ki ophisar na ki bor pynïaid distrik.
Ka jingrakhe ïa ka Jubili Ksiar ka long ha Wangala A’dam, ka ‘Garo Heritage Village’, Chibragre, naduh ka 11 haduh ka 14 tarik Naiwieng, 2026.
Kane ka prokram kaba saw sngi mynta u snem ka kynthup ïa ka jingpyninam ïa ki 1000 tylli ki ksing, ka ‘Rugala’, ka ‘Cha’chat So’a’, ki jingïalehkai tynrai, ki jingïakop rwai tynrai, ki jingbam tynrai bad kiwei-kiwei ki jingpyninam ïa ka kolshor.
Kan don ruh ka jingïashim bynta na ki kynhun ba la khot kyrpang jong ki jaidbynriew Garo kiba don ha Assam, Nagaland, Tripura, Karbi Anglong bad kiwei-kiwei ki jaka ba marjan. Kumjuh, la khot sngewbha ruh ïa ki kynhun kiba mihkhmat ïa ki Ruga, Chibok, Megam bad Atong.
Shuh shuh palat 300 tylli ki dukan pyninam la tyrwa ban pynïeng na ka bynta ki jingbam tynrai, ki jaiñ tynrai, ki jingdeng, ki jingshna kti, ki mar kiba pynmih napoh ka thaiñ bad ki ‘Souvenir’, ban thaw ki lad ki lynti ha ki ïew ki hat na ka bynta ki nongtrei kti bad ki nongseng kam lajong (trai-ri).
La khmih lynti ruh ïa ka jingwan jngoh jong ki ‘riew pawkhmat kiba kongsan ha kane ka tamasa ha kine ki 3 sngi ban wan – ha kaba ka jingwan jong ki nongjngohkai pyrthei kiba napoh ri bad nabar ri kumjuh kan sa nang kiew.
