Nongstoiñ, Jylliew 05:
Ka Dorbar Shnong jong kawei na ki shnong hapoh ka West Khasi Hills District kat haduh mynta ka khlem pat leit ban buh ïa ka jingujor lane ka kaiphod sha ki pulit wat hadien ba ka shnong ka la pyndep ïa ka jingwad bniah bad pynlong ruh ïa ka dorbar ban tohkit na ki nongshong shnong, ha kaba la ong ba ki dang don sa 22 ngut ki khynnah kiba la suba ba ki la shah leh be-ijot bad 15 ngut kiwei pat kiba u la pyrshang, hynrei da ka jingïakhun ki la lait noh.
Katei ka jingjia ka dei hadien ka jingkem noh jong ki pulit ka thanad Nongstoiñ ha ka 31 tarik u Jymmang 2023 ïa uwei u briew ïa uba la tip kyrteng u Mebanrilang Syiem Shangoi ïa kaba la suba jur ba u la donkti ban leh be-ijot ïa uwei u khynnah na kawei na ki shnong ha West Khasi Hills.
U Sordar Shnong katei ka shnong haba kren bad u nongthoh khubor halor katei ka jingbym pat lah jong ka shnong ban leit buh ïa ka jingujor lane ka kaiphod sha ki pulit wat hadien ba ka dorbar shnong ka la dep ban ïoh sa ïa ki phew ngut ki khynnah kiba la suba ba ki la ngat ha katei ka apot lyngba ka jingwan pyntip jong ki nongshong shnong ha ka dorbar kaba la pynlong ha ka sngi Saitjaiñ jong ka taïew ba la lah, u la ong ba ha ka jingshisha ka shnong ka la dei ban leit ha ka sngi Nyngkong, hynrei namar ki bun ki longïing kiba la wan ban pyntip ba ki don ki khun kiba la ngat ha katei ka apot ki don hapdeng ka jingshitom. Kumta kim shym pat ïoh ban ïasoi ïa ka FIR bad ka la pynlong ban suki noh ban leit buh sha ki pulit.
Shuh shuh na ka liang jong u Sordar u la pynpaw ba lehse lashai ka sngi ka 6 tarik lane ha kine ki sngi ban wan ka dorbar shnong kan sa leit ban buh noh ïa katei ka jingujor sha ki pulit.
Nalor kata, u sordar u la ïathuh ruh ba ha kaba ïadei bad ka jingthmu ban pynlong ïa ka jingïaid paidbah (rally) ban pynrem ïa utei u briew, u la ong ba ka dorbar shnong kan sa shong shwa ïa ka Executive Committee jong ka shnong namar lada lah, yn pynlong ruh ïa ka jingïalang ai jingpynshai ha ryngkat ka jingïatreilang bad ki tnat ba dei peit.
