Shillong, Jylliew 05:
U State President ka Bharatiya Janata Party (BJP), Bah Ernest Mawrie ha ka Lah Sngi U Blei u la ong ka la don ka sienjam na ka liang u nongïalam ka TMC, Dr. Mukul Sangma ban ïakynduh ïa ki heh nongïalam ka BJP ha New Delhi.
Kum ban shu kdew hangne, u Myntri Rangbah barim ka Jylla, Dr. Mukul Sangma dang shen, u la kyntait ïa ki khubor ba u la leit sha Delhi ban ïakynduh ïa ki nongïalam ba halor jong ka BJP.
“Ka don ka sienjam tangba imat kim shym la rai eiei. Ki pyrshang ban ïakynduh ïa ki nongïalam ba halor jong ka seng, ngi ïoh jingtip kumta. Hynrei kim shym la ïaid lyngba jong ngi bad kumta ngim don jingtip eiei,” la ong u Bah Mawrie.
U la ong ruh, “Ki leit ban ïakynduh ïa ki nongïalam ba halor jong ka seng sha Delhi tangba mynta pat ki la pynkut ïa kane bad kim shym la pyntip eiei sha ngi.”
Ki la don ki hamsaïa kiba saphriang halor ka jinglong-jingman ka saiñ pyrthei hapoh ka Jylla ba ki MLA ka Trinamool Congress (TMC) ki lah ban pynïasoh noh sha ka BJP.
Kham ha shuwa, ka la don ruh ka khubor ba u Dr. Sangma u la leit sha Delhi ban ïakynduh ïa ki heh nongïalam ka BJP.
Kum ban shu pynkynmaw, u Dr. Sangma lem bad 11 ngut kiwei pat ki MLA ki la mih noh na ka Congress ha u Naiwieng jong u snem 2021 ban pynïasoh noh sha ka TMC hapoh ka jingïalam ka Mamata Banerjee.
Ha kane ka ilekshon sha ka ïingdorbar thawaiñ ba dang shu dep, ka seng ka la pynïeng kyrtong ha baroh 60 tylli ki konstitwensi hynrei ka la lah ban jop tang ha 5 tylli ki konstitwensi.
Ki kyrtong ka seng kiba la jop ha kane ka ilekshon ki kynthup ïa 4 ngut na Ri-lum Garo – Dr. Mukul Sangma na Songsak, Miani D. Shira na Ampati, Rupa M. Marak na Dadenggre, Dr. Mizanur Rehman Kazi na Rajabala bad 1 na Ri-lum Khasi, Bah Charles Pyngrope na Nongthymmai.
