Shillong, Jylliew 05:
Ka sorkar jylla ha ka Lah Sngi U Blei ka la pyntip ba kumba 75 na ka 100 jong ka surok hapdeng ka Thadlaskeiñ bad Mihmyntdu kaba long shi bynta na ka Jowai Bypass la dep ban maramot. Katba ïa ka kam kaba dang sah ka jingpyntrei ka dang ïaid.
Na ka liang u nongmudui ïa ka mukotduma, u Kynjaimon Amse, u khlem woh daw halor katei, hynrei u la kdew sha ka nongrim jong ka mukotduma kaba ktah ïa ka surokbah (National Highway) baroh kawei haduh Ratacherra. U Bah Amse u la pyni da ki dur ki dar ha kaba ïadei bad ka jinglong jong ka surok ha Lumshnong bad kiwei ki jaka. Ïa kine ki dur ki dar la shon ha ka por mynsngi jong ka 1 tarik Jylliew, 2023.
“Ka long ka bym lah satia ban pdiang ba wat ha shwa ba ka aïom slap kan wan, ki don bun bah ki bynta jong ka surok ha Meghalaya kaba pynïasoh sha ka Barak Valley kiba la julor kumba la ïohi na ki dur ki dar wat la ka la don ka jingmaramot,” la ong ka High Court.
Na ka liang ka NHAI ka la pan por ban ai jubab, bad ka jingbishar kan sa long biang ha ka 13 tarik Jylliew, 2023. Kumta ka High Court ka la kyrmen ba ka surokbah baroh kawei ha ka jylla bad haduh Ratacherra, kynthup ka Jowai Bypass, kin long kiba biang wat la ka aïom slap ka lah ban sdang hapoh ki saw taïew ban wan.
