Shillong, Jylliew 05:
Ka Estimate Committee jong ka Meghalaya Legislative Assembly ka la lap ba ki skul Sorkar ha nongbah Delhi ki long shisha ki skul kiba la bit la biang bha naduh ka jingpynbiang ïa ki jingdonkam ha ki kamra klas ban hikai ïa ki khynnah, bad kaba kham pher shuh shuh ka long ba ka Sorkar ha Delhi kaba ïalam da ka Aam Admi Party (AAP) ka la don ruh ki School Health Clinic ban ai jingsumar ïa ki khynnah ha kano kano ka por ba donkam namar ka pang ka shitom.
Ka Estimate Committee kaba la lamkhmat da u MLA Bah Mayralborn Syiem ka la leit ban jngoh ïa ki skul Sorkar ha Delhi ha ka Lah Sngi U Blei ha ryngkat kiwei ki MLA kiba dei ki dkhot jong ka Estimate Committee kiba kynthup ïa u Bah Charles Marngar, Remingtone G Momin, Limison Sangma, Miani D Shira, nalor ki nongtrei jong ka Assembly.
Ïa kane ka jingleit jngoh jong ka Committee on Estimate na Meghalaya, la ïalam da u Chairman ka Estimate Committee jong ka Delhi Legislative Assembly, u Rajesh Gupta, MLA, u Ajay Dutta, MLA, bad kiwei kiwei ki MLA ka Delhi Legislative Assembly.
Ha kane ka jingleit jngoh, ka Estimate Committee na Meghalaya ka la leit jngoh ïa kawei na ki skul Sorkar (Government School), kata, ïa ka Rajkiya Pratibha Vikas Vidyalaya, kaba don ha Nai Basti, Kishan Ganj, New Delhi.
Ka jingleit jngoh ïa kane ka skul ka long ban sakhi hi da la ki jong ki khmat ïa ka rukom pynïaid ïa ki skul Sorkar ha nongbah Delhi.
Nangta, ka la lap ruh ba ki skul Sorkar ha Delhi ki don ïa ki Digital Classroom, CCTV ha man la ki kamra klas, Laptop, Library ha man la ki kamra klas.
Haba ïadei bad ki School Health Clinic, la ong ba ka Sorkar Delhi ka la dep ban buh haduh 20 tylli kine ki Clinic haduh mynta. Kawei ka clinic ka don iwei i ANM, iwei i Psychologist, iwei i MTW bad Doctor ban peit ban khmih na bynta 5 tylli ki School Clinic.
Kum ban pynkynmaw, ka Sorkar AAP ha Delhi hapoh ka jingïalam u Arvind Kejriwal kum u Myntri Rangbah, ka la phaikhmat bha bad shimkhia ban kyntiew ïa ka pule puthi bad ban pynbiang ki lad jingsumar nalor kiwei kiwei ki jingai jingshakri kiba ki nongshong shnong ki dei ban ïoh myntoi lyngba ki buit treikam jong ka Sorkar.
Shuh shuh, ka Estimate Committee ka la ïoh ruh ban leit jngoh ïa ka Mohalla Clinic, ha kaba ka Sorkar Delhi ka la dep ban buh haduh 521 tylli ki Mohalla Clinic.
Kine ki Clinic pat ki dei na ka bynta ki paidbah nongshong shnong bad ki longïing kiba duk, khlem da donkam ban siew dor eiei. Ha kine clinic, la aiei ïa ki dawai, haba peitbniah ïa ka snam (blood test), ultra sound, x-ray bad kiwei kiwei ki jingdonkam. Ha kine ki clinic, ki don ki Doctor, ki Nurse, bad ki Pharmacist.
Na ka bynta ki jingshitom kiba kham eh, ki doktor na kine ki Mohalla Clinic ki phah ïa ki nongpang sha ki aspatal.
