Shillong, Jylliew 05:
U Bah Paul Lyngdoh uba dei u Myntri hapoh ka Sorkar Meghalaya Democratic Alliance (MDA-2) bad uba long ruh u Nongïalam ka United Democratic Party (UDP), u la ai ka jingïaroh ïa ki paid Garo bad ong ba ki kham long rangbah bad kham stad ban bishar haba nujor bad ki Khasi.
Haba kren sha ki lad pathai khubor ha ka sngi Nyngkong ban pynpaw ïa ka jingsngew jong u halor ka jinglong jingman namar ka Reservation Policy bad Roster System, u Bah Paul u la ong “Ki Garo ki kham long rangbah bad kham stad haba ïanujor bad ngi ki Khasi. Ngi la shu pynheh ïa ki nia kai ha kiba bun ki kam ki bym donkam”.
“Kum ka nuksa, katto katne ki nia ki la mih halor u Myntri Rangbah Khasi ha u 2023, kam shym la don satia kaba kum kane ha Ri-lum Garo. Hynrei kaei kaba ki leh ka long ba ki pynkut ïa baroh ki jingkyrmen ba ngin ïoh ïa u Myntri Rangbah na ka jaidbynriew Khasi da kaba pynthikna ba na ki 24 seat ha Ri-lum Garo, haduh 18 seat ka la leit sha ka NPP. Ki khlem heh nia satia halor kane hynrei dei ma ngi ki la pynmih ïa baroh ki nia,” u la ong.
Une u nongïalam ka UDP u la ong, “Ngi ka jaidbynriew Khasi ngi dang long khyllung khynnah ha ka bor pyrkhat bad sngewthuh, ym kumba phai pat sha ki jaidbynriew Garo kiba sngewthuh bha halor ka kam saiñ hima bad ki long kham shemphang. Ha shwa ka ilekshon ngi hangne ngi la ïa pyrta ba ngi kwah Myntri Rangbah da u Khasi, hato na Garo ka mih ne em kum kata ka sur, kam don, hynrei ki jubab pat ha ka ilekshon.”
Haba kylli la ka jingbishar thymmai ïa ka Reservation Policy kan pynkut noh ïa ka jingeh ha ka jingbym ïoh kam ïoh jam ha Jylla, u Bah Paul u la ong ‘Da lei-lei ruh kan ym lah”.
U la batai ba ki don haduh 500 tylli ki kam kiba lait hapoh ka Sorkar bad ki Undertaking ha ka shisnem bad kane ka dei kaba nang ring sdot ha ka ïoh kam ïoh jam.
“Ha kane ka juk spah snem ba 21, ka Jylla ka dei ban ïakren kham bun eh ha ki kam kum ka kam jngohkai, kam thaiñ jingthaiñ, kam shangkai ha ki shnong nongkyndong, halor ki project ba ïarap bei pisa ka Sorkar, shibun ki lad ïoh kam bad kiwei kiwei. Namar kata, nga sngew ba ka jingpyrkhat jong ki ban buh hakhmat ïa ki mat ba kongsan ka long kaba bakla shibun,” la ong u Bah Paul.
