Shillong, Jylliew 05:
Palat spah tylli ki longïing kiba shu pdeng ha ka liang ka ïoh ka kot lane Above Poverty Line (APL) ki sah ha ka lyngngoh namar ka pisa kaba ki dei ban ïoh mar T.12, 000 hadien ba ki la dep shna ïa ki paiñkhana lyngba ka Swaach Bharat Mission jong u 2016-2017 ka la jah klep noh bad kim shym ïoh ban pdiang wat tang shi tyngka ruh.
Kane ka la jia ha ka shnong Umkrem kaba hap ha Mawthadraishan C&RD Block.
Ïa kane jingshna paiñkhana la pyntyllun da ka Mawthadraishan C&RD Block lyngba ka Village Water and Sanitation Committee (VWSC) Umkrem ha kitei ki snem ha kaba la shim ïa ka rai ryngkat ki nongshong shnong ba kin don ki longïing ki ban pynshna paiñkhana da ka VWSC bad kin don pat kiba shna hi da ki longïing.
La ong ba ym baroh ki la pyndep lut ïa kitei ki paiñkhana, hynrei naduh kitei ki snem ki longïing kiba la pyndep ki la kyntu ïa ka VWSC ban pyllait noh ïa ka pisa hynrei ka shu kut tang ha kaba ap.
U samla Bhabok Marweiñ na katei ka shnong uba la wad jingtip lyngba ka Right To Information (RTI), u la ïoh ïa ka jubab ha ka 14 tarik u Nohprah, 2022 kaba la batai ba ïa ka Work Order ban shna ïa ki paiñkhana ha ki 108 tylli ki longïing la dep pyllait naduh ka 01 tarik u Rymphang, 2017.
Ka don ruh ka jingkylli ban tip bniah shuh shuh la ka don ne em ka jingsei ïa ka pisa, bad ha ka katno tarik bad ha u snem katno.
U samla Bhabok u la ïathuh ba na ka liang ki bor ba dei peit ïa ka Block ki la ïamir jingmut bad ka shnong kumjuh bad ka VWSC bad hadien ka jubab RTI, la don ka dorbar ba ka Committee kan siew noh ïa ka pisa sha baroh kiba don kyrteng hadien ka elekshon MLA hynrei haduh mynta kim pat ïoh eiei.
U la ong ba ha ka dorbar, la dep bthah ïa ka VWSC ban siew noh tang T.10,000 shi ïing, hynrei kam shym la poi shano shano ruh wat la ki nongshong shnong ki ong ba ka pisa ka don bad ka VWSC.
Ki nongshong shnong ki la ïathuh ba ki la shem jingeh shibun la katta ki snem haba ki la nang pynlut ïa ka pisa na la pla ban shna ïa ki paiñkhana hynrei haduh mynta pat kim ïoh eiei ïa kata ka pisa ba la mang ka Sorkar.
Na ka liang ki lad pathai khubor ki la ïoh ban ïakren da ka phone ïa u Chairman ka VWSC, u Bah Stan Thabah uba la kyntait ban ong eiei da kaba ngiat ïa ka jingïakren sha u Sordar Shnong.
