Tura, Jylliew 05:
Uwei u nongkhaïi na Assam, uba la don ha lynti ban leit sha ïew ba shisien shi taïew ha Rongrikimgre kaba don hajan ka shnong Dumnikura kaba hap ha thanat Chokpot ha South Garo Hills, u la shah shoh ha ka step Lah Sngi U Blei ha ki lai ngut ki runar kiba la rah bad ki tiar pynmynsaw.
Katkum ka khubor na ki pulit, katei ka la jia ha ka por 4 baje mynstep ha ka por ba utei u nongkhaïi ba la tip kyrteng kum u Abdul Nur na Mankachar, Assam, u la shah pynsangeh ha kitei ki runar. Hadien kata, ki runar ki la lute T. 25,000 na u bad ka shoh ka dat.
Nalorkata, ki pulit ki la ong ba ha ka por ba shah shoh utei u nongkhaïi, u nongñiah bad nongbud ka kali ki la don lang, hynrei ki khlem leh eiei namar ki runar ki la pyni da ki tiar pynmynsaw.
La ong ba kata ka kali ka la kit ïa ki jhur ki jhep ban leit die ha katei ka ïew ba shisien shi taïew. Na ka liang ki pulit ki dang pynlong ïa ka jingtohkit halor katei ka jingjia.
